تانجو

بترقصي تانجو و بترقصي صالصا

دايما لطعم الفرح مشتاقة

و انا رقصتي رعشة الم خارسا

قوليلي ازاي يا حبيبتي نتلاقى

بتحبي صوت الناس و حكاويهم

بتحسي ف وجودهم بحرية

و انا مابشوفش غير صمت الشتا فيهم

و حيطان بتعلى تملي حواليا

ساعة ماقابل حزني ف عنيهم

ضحكة عينيكي بتبقى مش ليا

لو كنتي عايزة الفرح شاركيهم

لو كنتي عايزة تسكني فيا

لازم تكوني بجرحي قابلاني

و تقابلي زنزانتي و سجاني

و ايديكي ف ايديا

لازم تعيشي ف كهف احزاني

متسلسلة بيا

لو كنتي عايزة تسكني فيا

بترقصي تانجو و بترقصي صالصا

دايما لطعم الفرح مشتاقة

و انا رقصتي رعشة الم خارسا

قوليلي ازاي يا حبيبتي نتلاقى

علشان تكوني لقصتي بداية

و عشان تكوني برضه أخرتها

لازم تعيشي معايا جوايا

لازم طفولتك تنسى رقصتها

و تكشري شوية او تكبري شوية

لو كنتي عايزة تسكني فيا

-------------------------------

كلمات و الحان : انطونيوس نبيل

توزيع : يحيى محيي