Devotional (26th October 2020)

Topic (26th October– 1st November 2020) – “Ka jingsuk” (Peace)

“Namar kata, ba la pynksan ia ngi da ka jingngeit, ngi don ka jingiasuk bad U Blei da U Trai jong ngi U Jisu Khrist” (Rom 5:1)

**************************************

Ka phang ia kaba ngin ia peit ha kane ka taiew (26th October – 1st November 2020) ka long shaphang, “Ka jingsuk” (Peace). Ka pyrthei bad ki briew kylleng ki wad ia ka jingsuk ha ka jingim, kumta lyngba kane ka jingpuson ha kane ka taiew ngin ia peit ia ka jingsuk kaba shisha bad kumno ngi lah ban shem ia ka.

Uwei na ki nongtem guitar uba pawnam, U Jimi Hendrix, u la im ka jingim kaba la ngam ha ki jingsngewbha jong kane ka pyrthei, u la ngam ha u drugs bad u la im ka jingim kaba bunsien u leh kulmar wat ha ki rynsan kiba u dei ban tem. La iathuh ba ha kaba kut jong kawei ka concert ha u snem 1970, U Jimi u la lynthaw ia ka guitar ka jong u, bad katkum ka jingthoh jong U Robert McGee bad U Donald Sapaugh ki ong, ‘ba ha ka jingwad ia ka jingsuk, ki paitbah ki la ia risa bad pyrta da ka jingkmen haba ki iohi ia kata ka jingleh jong U Jimi.’ Hynrei, kynsan ki paitbah ki la sngapjar bad ym don uwei ruh u ban pynmih ia ka sur haba ki iohi ba U Jimi u kyllon ha madan da ki khohsiew bad u don ha kata ka dur (position) katto katne minit bad khlem khih, ki paitbah baroh ki la iatieng bad ki la mutdur kaei kaba la jia ia u. Hadien katto katne por, U Jimi u la kylli ia ki paitbah bad u ong, “If you know real peace, I want to visit with you backstage.” (Lada phi tip ia ka jingsuk kaba shisha, nga kwah ba phin wan bad nga sha lyndet jong kane ka rynsan). Hynrei ym don uwei ruh napdeng ki paitbah ki ban leit ne ban jubab ia ka jingkhot ka jong u. Bad hadien katto katne sngi na kata ka jingjia U Jimi u la iap na ka jingdih drugs palat (Drugs Overdose). Ong U Robert McGee bad U Donald Sapaugh, “Peace, real peace, eluded Jimi Hendrix.” (Ka jingsuk, ka jingsuk kaba shisha, ka la kiar na U Jimi Hendrix).

Haba nga pule ia kane ka jingjia shaphang U Jimi Hendrix ka wan ka jingkylli ha nga, hato ngi ruh ngi la shem mo ia ka jingsuk kaba shisha? Ka lah ban long ia kiba bun na phi, ba phi la pyrshang ban wad ia ka jingsuk kumba long U Jimi, phi lah ban wad ia ka jingsuk ha ka burom, ha ka spah, ha ki jingdih ba pynbuaid, hato phi la shem mo ia ka jingsuk ba shisha ha ki? Lada phim pat shem ia ka jingsuk ba shisha, phi donkam ban wad ha kawei pat ka jaka bad kata ka long, ha U Jisu Khrist. Dei tang lyngba ka jingaiti ka jong ngi sha U Jisu ba ngi lah ban ioh ia ka jingsuk kaba shisha, ka jingsuk ka jong U Blei (Rom 5:1). Ka donkam ia ngi ban plie ia ka jingkhang ka dohnud ka jong ngi ban khot ia U Syiem jong ka jingsuk ban wan ha ki dohnud ki jong ngi, bad haba ngi leh kumta ngin ioh ia ka jingsuk, ka jingsuk ym tang ha kiei kiei kiba shabar hynrei phin ioh ia ka jingsuk ha kaba jylliew jong ka dohnud ka jong phi (Philipi 4:6-7).

Jingduwai: - “Ah U Blei, ka dohnud ka jong nga ka wad bad ka thrang ia ka jingsuk kaba shisha, iarap ia nga ba ngan lah ban shem ia ka da kaba nga pdiang ia U Jisu Khrist ha ka jingim ka jong nga.” - Amen.

U Blei Un kyrkhu, Pastor Bidonbok Syiem.