दशैँ शुरु भएसँगै काठमाडौं उपत्यका छाड्नेहरुको संख्या बढ्दै गएको छ । दशैँलाई लक्षित गरी गत असोज १० देखि अग्रिम टिकट बुकिङ खुला भएसँगै उपत्यका छाड्नेहरुको संख्या बढेको हो । कोरोना महामारीका कारण अघिल्लो वर्ष उपत्यकाबाट न्यून संख्यामा मानिसहरु बाहिरिए पनि यसपटक भने लाखौँको संख्यामा मानिस बाहिरिएका छन् । असोज ११ देखि २५ गतेसम्म ६ लाख  ८८ हजार २ सय ४३ जनाले उपत्यका छाडेको महानगरीय ट्राफिक प्रहरी महाशाखाले जनाएको छ । देशको केन्द्रीय राजधानी काठमाडौँ उपत्यकालाई कर्मस्थल बनाएर बसेका मानिसहरु दशैँ मनाउन घर फर्केसँगै राजधानीका मुख्य सडक र बजारहरु सुनसान बन्दै गएका छन् ।