阮某問我敢有看到外公外媽的新聞？我共講有影過，無斟酌看，因為我無啥物感覺。伊講伊細漢就有感覺到，是按怎阿母這爿的阿公阿媽叫做外，阿爸這爿的就叫做內，這有重男輕女的差別。

我細漢的時陣，台北有一個阿媽跟阮住做伙，轉去斗南有一個阿媽，轉去大埤嘛閣有一個阿媽。做囡仔就是單純，大人叫你叫啥，你就叫啥，無咧想啥物重男輕女啦，抑是那會遮濟個阿媽？叫人的時陣毋捌叫過外公外馬抑是內公內媽，攏是叫阿公阿媽。其實佇我細漢有記持以來，毋捌看過阿公，當然就毋捌叫過，干焦有看過阿媽，叫過阿媽爾。

啥物時陣有用到「內、外」？干若是咧解釋、說明，是阿爸抑是阿母，佗一爿的親戚時，才會用到吧！無普通時無人按呢咧叫。分內外敢就是因為男尊女卑？我是感覺袂出來啦。內，敢有較高尚？抑是較親？外，就代表是外人的意思？這可能愛予專門的人來研究探討才知。

古早人嘛有講家己的翁婿叫做外子，牽手叫做內人，若內公內媽是因為男尊，外公外媽是因為女卑，按呢外子跟內人毋對拄好倒反？閣講一個較無關係、滾耍笑的講法，痔瘡嘛有分內痔跟外痔，敢講伊嘛有歧視的意思？

我家己的看法是，古早人結婚了，較濟是跟查埔這爿的親戚住做伙，若是講到阿爸這爿的阿公阿媽，會講是住佇咱厝內底的阿公阿媽，才叫做內公內媽；阿母彼爿的阿公阿媽，因為無住做伙，所以是外口的阿公阿媽，毋才叫做外公外媽。

我講到喙角全泡，阮某干焦落這句話爾，你無感覺是你的代誌！伊就是感覺重男輕女，應該改！這時陣，做外子的就毋通閣出聲才袂著銃！