Wat lauschters du?

Am Podcast too many tabs huelen d'Caro Worbs an de Miguel Robitzky hire Publikum mat op eng kuriéis an ënnerhalsam Rees duerch d'Ofgrënn vum Internet an déi verréckt Welt vun der Popkultur. En däitschen ëffentlech rechtleche Podcast, deen all Mëttwoch erauskënnt a schonn iwwert 200 Episoden zielt. De Prinzip ass, dass si sech géigesäiteg hier Tabs virstellen an zesumme probéieren se zouzemaachen. E Podcast fir all déi, déi gären ofschwäifen a sech vun de verrécktste Geschichte wëllen iwwerrasche loossen.

Papatriarcat ass e franséische Podcast vum Cédric Rostein, deen sech zanter 2020 mat Pappe sinn, Elterensinn a Geschlechterrollen auserneesetzt. An Interviewe mat Expert:innen an Elteren, geet et ëm eng respektvoll Erzéiung, d’Rechter vun de Kanner an eng méi gerecht Verdeelung vun der familiärer Aarbecht. Dobäi stellt de Podcast traditionell Virstellungen iwwert Pappsinn a Mammsinn a Fro a sicht no Weeër, fir d’Patriarchat am Alldag ze iwwerwannen. Papatriarcat verbënnt perséinlech Erfarunge mat gesellschaftleche Froen a wëll dozou ureegen, Elteresinn a Geschlechtergläichheet nei ze denken.

Bourgmeisterin ass e Podcastprojet vun der Julia Khalyavko, deen d’Geschicht, d’Kultur an d’Identitéit vu Lëtzebuerg op eng accessibel an ënnerhalsam Manéier an Englescher Sprooch vermëttelt. Mat den dräi Formater History Bites, Legacy Links a Fireside Chats verbënnt de Projet kuerz historesch Geschichten, Portraite vu Perséinlechkeeten a Gespréicher iwwer gesellschaftlech Froen. D’Zil ass et, d’Vergaangenheet vu Lëtzebuerg besser verständlech ze maachen an ze weisen, wéi si d’Land a seng Leit bis haut präägt.

"Pardon my Lëtzebuergesch" ass e lëtzebuergesche Laberpodcast vum Olivier Bichel an dem Deepak Pant, deen d’Aktualitéit, d’Politik a gesellschaftlech Trends analyséiert. Zenter dem Juli 2025 diskutéieren déi zwee a labberer Atmosphär iwwert déi Themen déi si interesséieren, dëst meeschtens eng gutt Dräivéierelstonn. Den Titel ass eng humorvoll Allusioun op den engleschen Ausdrock „Pardon my French“ a steet fir eng selbstironesch Approche.

L’amour moi j’en ai pas ass e franséische Podcast vun der Artistin Alyssia Derly, deen sech mat Léift, Bezéiungen an de gesellschaftlechen Erwaardungen un d'Geschlechter beschäftegt. A Gespréicher mat Invitéen a perséinleche Reflexioune geet et ëm emotional Verletzlechkeet, Männlechkeet, feministesch Perspektiven an d'Fro, wéi mir léieren, eis Gefiller auszedrécken an eis vulnerabel ze weisen. Aus enger perséinlecher Erfarung vu Libeskummer entstanen, ass de Podcast eng intim a engagéiert Reflexioun iwwer d'Léift an all hir Facetten.

„Gefühlserben – der Podcast“ vum a mam Sven Rohde, deen analyséiert, wéi Erfarungen, Emotiounen an ongeléiste Konflikter aus eiser Familljegeschicht eist Liewen haut prägen. De Journalist a Coach kombinéiert Psychologie, Trauma- a Familljefuerschung mat perséinleche Geschichten a behandelt Theme wéi d'Bezéiungen zu den Elteren, Partnerschaften, Selbstwäertgefill, Scham a transgenerational Aflëss. De Fokus läit ëmmer dorop, wéi mir dës belaaschtend Musteren erkennen, verstoen an, wa méiglech, ännere kënnen.

"Buvette – De Fussballpodcast" ass e lëtzebuergesche Podcast, dee vun Eldoradio produzéiert gëtt, an deem de Gilles Immer,Ben Vogel an Dylan Vogel iwwer Foussball zu Lëtzebuerg an doriwwer erausdiskutéieren. Et ginn Diskussiounen iwwer Clibb, Spiller, Competitiounen an aktuell Entwécklungen. EFussball-Laber-Podcast an entspaanter Atmosphär.

"All Kéier Anescht" ass de Podcast vum Service national de l’éducation inclusive (SNEI) fir d‘Enseignanten zu Lëtzebuerg. An der éischter Serie „Schüler am Autismus-Spektrum – Alldag an der Schoul“, realiséiert a Kooperatioun mam Centre pour enfants et jeunes présentant un trouble du spectre de l’autisme (CTSA), ginn déi vill Gesiichter vum Autismus am Bildungskontext beliicht. Et gi 6 Episode vun ongeféier enger hallwer Stonn.

De Bob Blume ass Enseignant a Bildungsinfluencer. Am däitschen SWR-Podcast „Die Schule brennt“ sicht hien zesumme mat Expert:innen no Léisunge fir déi ënnerschiddlech Erausfuerderunge vum Bildungssystem.

All zweete Méindeg kënnt e neien Episod eraus. An den éischten 3 Staffele vum Podcast hunn och prominent Perséinlechkeeten iwwert hier Schoulzäit geschwat a wat do gutt a manner gutt gelaf ass.

„Wirecard: 1,9 Milliarden Lügen“ erzielt de spektakuläre Fall vum däitsche Bezuelungsdéngscht Wirecard, dee vun engem gefeierten DAXX-Konzern zu engem vun de gréisste Finanzskandaler an Europa ginn ass. D'Investigativjournalisten vun der Süddeutschen Zeitung kombinéieren exklusiv Recherchen, Originaltéin an eng spannend Erzielweis zu engem richtege Wirtschaftskrimi. Am Mëttelpunkt stinn de fréieren CEO Markus Braun an de bis haut flüchtege Jan Marsalek, deem seng Geschicht ëmmer méi a Richtung Spionage féiert. Sou gëtt aus engem komplexe Finanzthema e spannende Podcast, deen och ouni wirtschaftlecht Virwëssen nozevollzéien ass.