D'lescht Joer koum den Artuso-Rapport eraus, iwwert d’Roll vun der Verwaltungskommissioun an der Exil-Regierung am Zweete Weltkrich bei der Juddeverfolgung zu Lëtzebuerg. Den Historiker Vincent Artuso huet domat en Optrag vun der Regierung ausgefouert, déi wollt d’Fro klären, wéi sech déi Lëtzebuerger Autoritéite géintiwwer der Juddeverfolgung verhalen hunn. Huet d‘Verwaltungskommissioun wëllentlech doru kollaboréiert oder huet si ënner Zwang verschidde Moossnamen ausgefouert? A wat war d’Roll vun der Exil-Regierung, déi den 10. Mee 1940 geflücht war?

D’Renée Wagener schwätzt mam Vincent Artuso iwwert seng Recherchen a seng Approche: Firwat huet hien zum Beispill och iwwert d’Aarbecht vun der Lëtzebuerger Administratioun an den Drësseger Jore recherchéiert? Opgrond vun de Conclusioune vum Rapport stellt sech d’Fro, wéi sech Lëtzebuerg am europäesche Kontext situéiert, souwuel wat d’geschichtlech Faiten, wéi och, wat den Ëmgang mat der Geschicht ugeet.