وبأتنازل

وأبيع روحي فـ مزاد حيرتِك

ماقولش بـ كام؟

وعامل م اللقا عازل

ما بين إحساسي بالغربة

وبين تصديقي للأحلام

وأميل على إيدِك الناعمة

بإيدي عشان أكلِّمها

وأعلِّمها

تُحط لحزننا نهاية

آلاقي ضباب غريب أعمى

بيسرق ضحكتِك مني

بيهزمني

ويخنق حاجة جوَّايا

ونفسي أصرخ وأبوحلِك

بالألم والخوف

وأكون ثغرة فـ حصون كُحلِك

لكن مكسوف

عشان مسنودة بجروحِك

على ضحكي

عشان عايزاني آه عايزاني

لما أحكي

مابانش حزين

وباين صرختي تاهت

فـ وسط كلام كتير باهت

بأقولهولِك

ومش عارف واخدني لفين

وأعيدهولِك مِن الأوِّل

وتتشبِّك صوابعنا

بتنكر إننا ضيعنا

يموت الحلم يتحوِّل

عرق بارد ما بين كفِّين

-------------------------------

كلمات والحان: أنطونيوس نبيل

توزيع: احمد العسال