【詩名】：我欲砌一間處

【作者】：林鳳珠

【詩文】：

我欲砌一間處

毋是欲置山內砌一間處

是欲置心內砌一間處

我欲砌一間處

毋是欲用鋼筋砌一間處

是欲用石頭疊一間處

處兮內面攏無隔間

一塊大石桌加匟置窗也前

將即片窗也 畫出一幅活兮山景

將一壺茶 泡出歸間處兮清閒

處兮內面攏無間隔

一塊大石桌 會當做眠床更會當泡茶

若有涼涼兮風適好經過

會使加減入來做夥坐

我欲砌一間處

處兮門窗攏無設鎖

想欲動

我就處前處後懶懶逡

想欲靜

我就來壁邊打一個蓮花座

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。