طبطب على جرح الطريق مذهول

الشمس قامتْ م الوجع لاطمة

فين جنِّتَك خبِّيتها فين ماتقول

الموت لهفها كُلَّها فـ قطمة

وسط الزحام.. بأحسّ أكتر باللي ضاع منِّي

وسط الزحام.. مافيش طريق لعينيكي بيوصَّل

وسط الزحام.. إزاي طيور الحلم هـ تغني

ونتي اللي على قدِّك ربيع الحلم متفصَّل

وسط الزحام.. اليأس ليه رافض يسلسلني

وسط الزحام.. ساكت عشان ويَّاكي بأتكلِّم

وسط الزحام.. مافيش عيون بالدمع تغسلني

مع إنْ فـ غيابِك حيطان الكون بتتألِّم

وسط الزحام

وسط الزحام.. حُضنِك زمان مِن شهدُه دوَّقني

وسط الزحام.. نهر الوشوش بالغلّ متملَّح

وسط الزحام.. إزاي تسيبي الليل يطوَّقني

ونتي اللي فـ عينيكي الغُنا بالضيّ متسلَّح

وسط الزحام.. ماعدش شيء يقدر يهددني

وسط الزحام.. شوفتْ الرماد بالدم متعطَّر

وسط الزحام.. قالوا العطش عنِّك هـ يبعدني

أنا قولتْ لو شوفتي السما فـ عينيا هـ تمطَّر

لو شوفتي فـ عينيا السما فـ عينيكي هـ تمطَّر

وسط الزحام

..........................

كلمات وألحان: أنطونيوس نبيل

توزيع: محمد يسري

كمان: يحيى الموجي

عود: أشرف السبكي

هندسة صوت وماستر: ميشيل عبد الملك

شكر خاص للفنانة: مريم حلمي

Artwork: Icarus by Henri Matisse