窗外雷公爍爁落著大雨，少年人情場失志，規工吼攏袂煞，用目屎洗面。阿媽看了心足毋甘，就問少年人：

「你敢知影天頂哪會落遐大的雨？」少年人干焦直直哭爾，攏無欲講話。

「你看，爍爁是天的鎖匙，鎖匙共天拍開，雨水就㴙㴙滴。拍愈開，雨愈大。你若艱苦就大聲共吼出來袂要緊，目屎流流ê，鬱悶敨敨ê，心就開矣。」

紲落來，阿媽對神明桌下跤的屜仔內底，提出一封已經藏幾偌十冬，閣猶毋捌拆開過的批，跟少年人講：「人若無緣做伙就免閣講啥，扯扯ê煞煞去就好。明明知影我青盲牛毋捌字，閣寫批來糟踏我......」

這是我對作詞家許常德佇「無字的情批」這條歌內底所寫的詞，家己用想的編出來的劇情。有人講，這短短無到二百字的歌詞，會使寫出兩代人無仝的愛情觀，跟承受的社會壓力，猶閣有隔代祖孫仔之間的互相疼惜，跟無出現佇歌詞畫面內底，軟汫無膽，無肩胛頭袂堪得擔責任的男女配角，許先生寫歌詞的工夫真正有厲害。

有迷眾問許先生，網路頂有人咧講，歌詞所寫的是原唱黃乙玲怹阿媽親身發生的代誌，許先生已經有回覆，這完全是伊創造出來的故事，靈感一來，伊開無到一點鐘就寫好矣。提予游鴻明作曲，伊看了嘛隨有想法。

唱予逐家聽進前，我先共歌詞唸一遍。

無字的情批

作詞：許常德

作曲：游鴻明

阿媽毋捌字　但是伊捌真濟的代誌

伊講閃電是天的鎖匙　鎖匙拍開有雨水

阿媽毋捌字　但是有一張情批寫予伊

經過幾十年毋捌拆開　伊講寫字不如相思

我愛的伊　欲來離開　伊講孤單上適合伊

無留半字　就斷了過去　毋甘心付出　為伊吼規暝

我愛的伊　欲來離開　伊講孤單上適合伊

山盟海誓　也失去意義　情批攏無字　癡心變青盲

我共阿媽問　阿媽的情批是寫啥物

伊講情人欲愛無勇氣　才來用字騙情義

伊講情人欲愛無勇氣　才來用字騙分開