莊子講：莫若以明，明字是日頭佮月娘的組合。意思是講，若會使用日頭佮月娘个懸度來看代誌，就無啥物通好諍囉！

最近防疫中心公佈得新冠肺炎的人數內底，開始甲進前疫情突然間湠開，檢驗塞車袂赴驗出來的資料，補轉去前幾工的確診人數，真濟老百姓是看佮霧嗄嗄，捎攏無。

有人講舊年美國予病毒湠甲糜糜卯卯的時陣，就攏有甲袂赴驗出來的資料補轉去，按呢才會使正確判斷疫情會按怎發展（ https://bit.ly/3bQPg2R ）。嘛有人講你若欲按呢做，就愛學人美國先講予好，疫情突然間湠開，袂赴檢驗的有偌濟，這馬這得病的人數毋是上尾的數字，會閣補資料起裡。咱攏已經守一年矣，那會無甲別人的經驗先學起來囥？

有人嘛會講遐是得病的案件湠傷緊，第一線的醫護、檢驗人員攏無閒到東倒西歪，地方政府無人鬥跤手拍資料，資料若不齊全系統嘛會退件，通報案件就漏勾去。立場無仝的人聽著就罵講，通報制度是中央規定，系統嘛是中央設計，這馬這咧制度袂赴反應這馬的疫情就變成地方政府的問題？

是毋是兩爿聽起來攏真有道理？若欲閣繼續諍一定諍袂了，你有你的苦衷，我有我的難處；你推你的責任，我拍我的太極。咱若學莊子教咱的方法，用日頭佮月娘的懸度看落來地球，看地球頂咱的寶島台灣，按怎做才會使隨時把握疫情的變化，趕緊甲病毒擋落來，莫閣予人穢著，抑是穢著嘛湠袂出去的辦法，就免閣開氣力去諍遐有的無的矣。