這遍去日本本島的東北𨑨迌五工，上尾工佇仙台機場，等欲坐長榮的航班飛轉來台灣，有跟導遊訂物件的人攏佇邊仔整理行李，共提到的物件囥入去欲託運的大行李箱仔內底。我無跟導遊買物件，行李就免閣拍開整理，徛佇邊仔等。這時陣，有一個查某囡仔講中語，叫我幫伊寫問卷，主要是問阮來日本𨑨迌的感覺，這是仙台政府委託怹來問台灣人，是按怎知影來東北𨑨迌？𨑨迌了感覺按怎？仙台政府怹若來台灣辦觀光推廣的活動，我會想欲去看無？

導遊先生嘛佇上尾工叫阮掃一個QR code，連去一個線頂的問卷，問阮對這遍旅行社安排的行程、飯店、餐點、導遊的意見調查。這款的問卷，一定攏會叫你打分數，問你對旅行社各種服務的提供有滿意無？滿意抑是不滿意的程度是幾分？有啥物款的批評指教欲共怹講無？這種的問卷，收集愈濟了後，無論是仙台政府抑是旅行社，怹就會共這些資料提來分析，予怹家己會使改善服務品質，予怹家己閣較進步，予人客對怹閣較滿意。

無論是政府抑是企業，主動叫人客愛共怹批評指教，來提升怹的服務品質，這本體是一件誠好的代誌。但因為有愈來愈濟的團體、組織攏綴咧按呢做，甚至毋是問別人對家己的意見，有誠濟媒體抑是網路頂的平台，怹是咧問別人對別人的意見，譬如講，用google地圖揣到的店，你去吃過了，欲予怹幾粒星？這是google叫你做的，毋是店頭家叫你寫的，無是按怎有些店頭家，看到人客予伊一粒星會袂爽，猶閣有無水準的媒體，會提這種消息來做新聞，前一層仔的白飯之亂就是按呢來的。阮阿爸上愛看的政論節目嘛仝款，倩來上節目的來賓，攏是咧講佗一個政治人物按怎，無人咧講伊家己按怎，節目的上尾，閣有字幕會按呢寫「來賓的意見無代表本台的立場」這款無負責任的話，致使佇咱這個社會中，有各種的活動，規工咧叫人打分數，予人幾粒星，叫人講別人的好歹，論斷別人的行為，無人咧看家己，反省家己，無形中已經影響到咱的社會風氣。

教人修行的方法內底，定定攏有聽到人按呢講「莫去講別人的是非長短」，嘛有人講「無欲評論別人的好歹，是自我修養的開始」。這攏是咧教人毋通造口業；欲剾別人的喙鬚進前，家己的喙鬚有先剾予清氣無？修養好的人，攏是先對家己做起，先看家己做了對無？好無？家己先做予好，比去講別人做了無好閣較重要。但現此時的這款社會風氣，紲攏咧教人去講別人的好歹、媠䆀，拍別人的分數，評論別人的是非，尤其佇網路世界中，根本無人知影誰是誰？逐家講出來的話，拍出來的分數，會變閣較歹聽、閣較極端。

就是因為這款風氣的影響，社會中有愈來愈濟人，明明就跟咱無底代，伊嘛欲去跟人插一跤。這款的熱情，若囥佇對公共事務的關心，對政府不公不義的監督，是真好的代誌。但偏偏這款人會去沐的，攏是一寡私領域的代誌較濟，公共領域的代誌紲顛倒少。這款人嘛是彼的想欲利用網路來𤆬風向的人，怹上好的對象。這些人袂去分辦這新聞講的是真的抑是假的？袂去探查毋若表面所看到的爾，閣較深入的事實是啥？看到別人掔石頭就綴咧掔，聽到別人開銃，伊嘛絕對綴咧開，無咧跟你客氣！

這改阮讀冊會讀的冊叫做「流浪的月」，伊有得到日本的文學小說獎。內底的故事嘛有講到差不多仝款的社會現象。男主角是一個生活佇家己單純自卑世界中的人，因為有一部分的身體無閣繼續大漢，造成伊不啥愛跟人交睬的心理。但伊並無有害人的心，有的干焦是較愛跟囡仔做伙的個性。少年時因為對法律的無知，收容一個離家出走的小學生女主角，紲予人判刑，予人當做變態，當做是一個專門誘拐查某囡仔的查晡人。這個事件，予彼時陣的新聞報到通人知，怹兩人佇河邊𨑨迌，予警察揣到掠起來的影片，嘛囥佇網路頂四界放送。

干焦看新聞的人，無人知影男主角無做歹代，無人知影女主角是因為暗時仔定定會去予蹛做伙的表兄欺負侮辱，才來離家出走，無想欲轉去。顛倒是跟男主角做伙，伊才有安全感，才有一個古椎可愛會笑閣愛𨑨迌的查某囡仔款。男主角的善良，女主角有親身的感受。但是全世界跟怹兩個無底代的人，攏干焦看到表面上的新聞報導，認為男主角是壞人，女主角是被害者。就連佇十偌冬後，女主角已經是大人矣，無意中拄到男主角，想欲跟伊做伙，怹兩人過去發生的新聞事件，紲予人一遍閣一遍搜出來講，提出來罵，予男主角一遍閣一遍遭受到跟當初仝款，全是無底代的人對伊的謾罵、噴漆、歧視跟𧮙姦落撟。這款全是好玄的份子，用怹家己認定的正義感四界亂噴，用充滿暴力的語言對待跟怹無底代的人，這種的社會病態，會使講是比人身上的病疼閣較歹醫，文明社會一定愛真嚴肅認真來反省這個社會議題才對。