老菩薩退化到足濟代誌無法度家己做的時陣，伊是足無愛共人麻煩，定定閣想看家己是毋是猶閣會使做，阮嘛是鼓勵伊「欲家己徛起來看覓無？」「欲捀碗家己食無？抑是我夾予你食？」...雖然中醫師表兄有共老菩薩開一寡補中溢氣湯、虎潛丸...等等補身體的中藥粉予食，但嘛是無啥物改善，老菩薩的氣力就敢若消風仝款，一工不如一工。

頂禮拜三早起，老菩薩有家己用吸管吸一碗公阿母絞的五榖豆奶。中晝頓問伊欲家己食抑是共飼，伊就無啥反應矣。我共飼一喙仔卵，伊佇喙內哺到睏去，無吞落去。我驚伊睏去了毋知會去噎著無，就共挖挖出來。老菩薩若無用伊的手搝我的皮帶，我一個人是無法度共伊對坐的藤椅徙去眠床頂睏的。

坐佇藤椅睏到予人叫袂醒，我足驚老菩薩是毋是已經過往矣，看伊閣有咧喘氣，就共伊扶予正，予伊稍睏一下，聽候二兄轉來有人手鬥相工時，才來共徙去眠床睏，順續佇家族的line群組內底講一聲，可能是上尾階段。

拜四早起二兄幫老菩薩換尿褲外褲了，滴幾滴滾水予老菩薩，看老菩薩目睭有擘開，就提吸管予吸，結果老菩薩閣有吸滿滿的兩杯滾水。目睭雖然有擘開，但袂看人，無眼神，共叫的時陣，有時有應，有時無應，有應的方式嘛干焦賰頕頭、幌頭，抑是一字「好」、「莫」。有時佇耳空邊叫伊唸「阿彌陀佛」，伊有反應的時陣就會綴咧唸「阿....」一字有聲，後面賰喙形爾。

出家的小弟有照顧過一個老師父過往的經驗，阮就聽伊的吩咐，一兩點鐘就共老菩薩滴水，看伊會吞無？我若看伊有吞水，就順續共問講「腹肚會枵無？欲食物件無？」老菩薩有共我應過一遍講「莫啦！」聽起來老菩薩是想欲好好的歇睏矣。

拜五拜六差不多仝款，無回應的時間愈來愈長，共滴水嘛無吞較濟。雖然攏無食物件，但早時跟暗時共換衫褲時，攏閣有放屎出來。大便這件代誌是老菩薩這段時間以來，每工上掛念的，所以這兩三工就共進前有食入去腹肚的物件攏放予清氣矣。

禮拜全家攏轉來了，老菩薩的喘氣愈來愈緊，頭殼跟身軀嘛直直流汗，跤手愈來愈涼。下晡外口的天氣變甲足奇怪，突然間若風颱的大風大雨，閣兼霆雷公爍爁，就拄好佇阮四兄弟做伙共老菩薩換好焦的衫褲，予老菩薩佇眠床頂䖙予好，出家的小弟滴水佇老菩薩的喙無啉對喙角流出來了，老菩薩的嚨喉振動一下，就無閣喘氣矣。

細漢的時陣攏聽講偉大的人物往生時，天嘛會綴咧吼，想袂到老菩薩嘛是這款偉大的人物。嘛捌聽過凡人修道欲飛天化仙進前，愛渡過雷劫，看起來老菩薩禮拜彼日，毋是成佛就是去做仙。老菩薩有交代阮兄弟，簡單就好，無欲去齪嘈親情好友，所以阮無對外發佈伊的訃聞。毋過佇法會開始進前，紲發生大地震。人講地震是地牛翻身，老菩薩拄好肖牛，原來老菩薩是用這款的方式，直接向全台灣的親情五十告別。