這篇是共2020年4月4號的面冊貼文改寫做台文

自從三月份的生日會，媠羊講伊今年的生日願望，是會當共伊的母語揀轉來捷講捷用了，跟伊仝辦公室的彼陣古錐同事就足捧場的，只要跟媠羊開講，攏會儘量用伊的母語，這款的同事情誼，真正予人足感動，只是有當時仔聽到無稍輾轉的台語，嘛會予人感覺愛笑爾。

有一工，媠羊去便所小解，大尾CEO嘛拄好入內便所，看著媠羊就隨用台語跟伊相借問：「你嘛來『旋』尿喔。」媠羊隨共應講：「對呀，拄才啉幾偌甌茶，愛小來敨一下。」

紲落來，大尾突然間用足正經的面腔跟媠羊討論起來「『旋』這個說法佇台語內底，是不是有比較較粗俗、土直的感覺？」。媠羊旋了交懍恂一下，共石門水庫搝予好，行去水度頭遐，一面洗手一面共大尾講「袂呀！佇阮讀國中抑是高中的國文課本內底，文言文毋是攏按呢用？古早人就是用這個動詞，古早的讀冊人寫佇文章內底，應該袂是一種粗俗的說法吧？」

大尾看著媠羊遐認真的表情，若像毋是咧共伊滾耍笑，伊嘛用懸八度的世界男懸音的音調講：「Are you kidding me ?」CEO大尾捌跟阮滾耍笑講伊的Mother tongue是English，果然佇情急之下的自然反應，就會當證明一切。

轉去家己坐位了，媠羊就共佇線頂的國語字典查到的解釋，切圖line予大尾。想袂到佇無啥咧講台語的讀冊年代，這旋字予國文老師教了就記到旦。後來，大尾佇這篇貼文的下跤有回覆怹兜講母語的笑詼代誌：「今馬我佇厝內嘛儘量講母語，若跟厝內底的人有冤家相諍的時陣，嘛愛用母語來冤來諍，突然間紲毋知欲按怎冤按怎諍，氣氛顛倒變甲足快樂矣，真正予人想袂到。」