ye na thī hamārī qismat ki visāl-e-yār hotā

agar aur jiite rahte yahī intizār hotā

visāl-e-yār=meeting with lover

tire va.ade par jiye ham to ye jaan jhuuT jaanā

ki ḳhushī se mar na jaate agar e'tibār hotā

tirī nāzukī se jaanā ki bañdhā thā ahd bodā

kabhī tū na toḌ saktā agar ustuvār hotā

bañdhā=tie, bodā=delicate, ustuvār=strong

koī mere dil se pūchhe tire tīr-e-nīm-kash ko

ye ḳhalish kahāñ se hotī jo jigar ke paar hotā

tīr-e-nīm-kash=half drawn arrow, khalish=unease, jigar=heart

ye kahāñ kī dostī hai ki bane haiñ dost nāseh

koī chārasāz hotā koī ġham-gusār hotā

nāseh=advisor, ġham-gusār=comforter

rag-e-sañg se Tapaktā vo lahū ki phir na thamtā

jise ġham samajh rahe ho ye agar sharār hotā

rag-e-sañg=vein of stone, lahū =blood, sharār =spark

ġham agarche jāñ-gusil hai pa kahāñ bacheñ ki dil hai

ġham-e-ishq gar na hotā ġham-e-rozgār hotā

jāñ-gusil=heart breaking, bacheñ=escape, ġham-e-rozgār=sorrow of sustenance 

kahūñ kis se maiñ ki kyā hai shab-e-ġham burī balā hai

mujhe kyā burā thā marnā agar ek baar hotā

shab-e-ġham= night of sorrow

hue mar ke ham jo rusvā hue kyuuñ na ġharq-e-dariyā

na kabhī janāza uThtā na kahīñ mazār hotā

rusvā= disgrace, ġharq-e-dariyā= drown in the river, janāza= funeral, mazār= shrine

use kaun dekh saktā ki yagāna hai vo yaktā

jo duī kī bū bhī hotī to kahīñ do-chār hotā

yagāna=unique

ye masā.il-e-tasavvuf ye tirā bayān 'ġhālib'

tujhe ham valī samajhte jo na bāda-ḳhvār hotā

masā.il-e-tasavvuf= problems of mysticism/sufism, valī=saint, bāda-ḳhvār=drinker