這篇是共2020年6月24號的面冊貼文，改寫做台文

松鴉買一堆素包子轉來厝裡，拄共囥予涼無偌久，就直接共冷凍起來矣，因為包子店的頭家講，囥冰廂下跤層冷藏干焦會使囥三天，冷凍會使囥一個月慢慢仔吃。

隔轉工透早，松鴉想欲提三粒包子炊來食，才發現包子毋是一粒一粒分開結凍，是十幾粒包子全部黏做伙矣。

「咦？昨昏毋是囥涼了才凍起來的？那會變按呢？」松鴉看一下紲規个愣去。

「妳愛先共包子囥下跤層，等暗時欲睏進前，才共包子擘予散開提去冷凍。」媠羊佇邊仔老神在在，一面洗著早頓欲拍豆乳的豆子，一面講予松鴉聽。

為著欲予其他不欲炊的包子，會使趕快囥轉去冷凍，松鴉開始共遮結規揹的包子提起來敲。

「妳會使稍囥一下，等怹退冰才閣弄，沒必要遮趕吧？妳腹肚是有遐爾仔枵喔？」平常時攏是媠羊拍好豆乳炊好包子，才會叫松鴉起床的。這工松鴉天猶未光就家己爬起床，可能真正是去予腹肚枵到醒起來。

「無欲炊的包子，退冰了閣再結凍毋是無好？」松鴉繼續敲彼大揹的包子，無想欲停落來的感覺，包子嘛敢若攏無想欲振動。

「妳囥咧等，怹會退冰；妳繼續敲，怹嘛會退冰。只是妳繼續敲，等包子予妳敲落來的時陣，妳會掠做是因為有妳用敲的，包子才擘會落來，紲看無是退冰才是真正予包子會使予妳敲落來的原因。」對松鴉的表情看起來，伊一定感覺媠羊閣咧雜唸矣，連擘一下包子嘛會使雜唸，伊嘛袂癮擘矣，予伊家己的耳空較清淨些。

其實，生活中有足濟狀況，可能攏親像松鴉想欲用敲的方式，擘開結規揹的包子仝款，我們干焦看會到家己認定的方法，紲看無真正的原因是啥，若有成功，就感覺是家己用對方法，雖然按呢會使予咱愈來愈有自信，但無看到真正解決問題的原因，嘛有可能予咱錯誤的自信，變做自我的放大。

影響一件代誌的結果，除了遐些明顯可見，看會到的原因之外，有可能誠濟是無遐簡單予人覺察會到的隱變量，才是左右全局的關鍵因素。