我蹛桃園市，佇徛家附近的郵局，我去寄批的時陣，若聽著我講「掛號」，服務人員會隨用台語共我應「好」，用台語講幾箍銀，紲落來問我「愛報數無？」我應「免」，錢納了就提著一張掛號的證明單仔。

昨昏我佇公司附近的郵局寄批，這郵局是倚台北車頭的補習街附近，我仝款用台語講「掛號」，櫃檯小姐聽了，無跟桃園仝款隨用台語共我應好，繼續用國語報我偌濟錢，問我「需不需要購票證明？」我共應「免」。

我無想到伊共我的「免」聽做「欲」，阮兩個就一個講國語，一個講台語，開始進入雞仔鴨仔講袂通的場面。伊繼續問我「抬頭要打什麼？」我共錢囥佇櫃檯頂，規頭殻干焦想提著掛號單仔了就欲來走矣。伊看我無反應，閣問一遍「抬頭是什麼」？

我叫是伊咧問我批是欲寄予誰？我講「我有寫矣」！我是欲寄予健保局台北業務組，「無寫健保局敢袂使？地址對寄會到就好矣」伊繼續講「公司的抬頭」「抬頭要打什麼」我共伊問的抬頭鬥對收件的所在，一直想袂出我佗位寫毋對，閣看伊直直跳針，就共講「妳拍健保局就好矣」！

尾溜我紲提到兩張單仔，一張是原本就會提到的掛號證明，另外一張是「購票證明」，頂懸寫「茲證明 健保局 本日確經購買郵資券...」毋知健保局欲予我報數無？