做囡仔的時陣，干焦知影有的人尻川尖、無時著定、坐攏坐不牢，有人較孽潲、愛創治人，可能毋是老師心目中的好學生爾。但是大漢了，定定聽著學校老師若拄著這款學生，攏會叫家長𤆬去看醫生，看是毋是「過動兒」？愛吃藥仔醫無？

較早無人共遮的囡仔當作病，細漢攏鬥陣耍做伙的囡仔伴，人無吃藥仔嘛大漢矣，各行各業攏有咧發展。所以，若聽到朋友人客講，厝內底有囡仔予醫生講是過動兒，我攏感覺是做爸母的傷過緊張！

自從新聞媒體定定共人自殺的原因跟「憂鬱症」囥做伙了，毋知對啥物時陣開始，我嘛相信「憂鬱症」是一種腦部發生變異的病，愛吃會使刺激咱頭殻內的大腦，生較濟予咱心情爽快化學成份的藥仔來治療才對。這款分析腦部變化的講法，予人聽起來就足有科學根據矣，但是咱攏毋知影科學家到底是按怎確定怹的因果關係？是人先憂鬱才造成伊的腦部變化？抑是伊的大腦先變異，這個人才會得憂鬱症？

阮讀冊會的𤆬頭老師阿得，這擺介紹一本冊叫做「照亮憂鬱黑洞的一束光」，是一個外國記者寫的，伊開三冬的時間，行過六千外公里，深入幾偌的國家，採訪社會科學家、精神科醫生、心理治療師、演化生物學家、社會運動人士，抑有跟伊仝款予憂鬱症拖磨受苦幾偌冬的病人。伊發覺講，造成憂鬱症的原因複雜，毋是孤孤講是一個人的大腦破病，干焦吃藥仔就好。伊所整理出來的社會因素，會使講是一帖免吃藥仔的藥單，嘛是予伊家己戒斷對十八歲開始，吃到三十外歲憂鬱症藥仔的藥方。