【詩名】：柚子花

【作者】：藍淑貞

【詩文】：

佮春風有約會

佇每年的三月

開純白的花

將芳味掖甲滿四界

蜜蜂真心對待伊

娓蝶飛相隨

暗光鳥為伊唱歌詩

蟋蟀仔覕樹仔跤講相思

一陣軟風吹來

樹枝輕輕仔搖擺

花瓣像落雪

樹仔跤鋪白紗

阿母將柚仔花芳

參阿爸的希望

一重一重浸佇甕仔--裡

激出迷人的醉意

泡一鈷柚仔花茶

坐佇柚仔花前

阿爸笑微微

看著八月收成時

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。