【詩名】：欲行對阿母的聽候

【作者】：韓滿

【詩文】：

天烏烏

雨粗粗

身軀淋甲澹糊糊

欲行緊 袂大步

無張持 人跋倒

車 一台一台咻咻叫

灯 一葩一葩直直照

心 一下一下踞踞趒

柺仔哪攏摸袂著

攑頭對天一直問

這條路哪會遐爾長

有厝是欲按怎轉

摸著矣

閣跋一倒

閣牚一擺

較艱苦嘛毋敢哀

天愈烏

雨愈粗

身軀咧摔烏寒雨

較細步 較緊到

欲行對阿母的聽候

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。