【詩名】：咱來去聞稻草兮芳

【作者】：林鳳珠

【詩文】：

雨淅淅也落 已經落幾多工

東邊面彼大片田 也已經收過四月冬

來！咱趁一個雨縫

我率你來去聞稻草兮芳

咱大手牽小手 小腳步追大腳步

行佇長長隘隘兮田岸也路

咱延田岸也路 跳落去田內面踏霑霑兮土

奚土軟軟

咱佇土面頂 跳來跳去歡喜直耍

田內面兮稻也已經割空空

排歸排兮稻草聞起來有夠芳

用手䘼尾嘛好 用衫也裾尾嘛會使

咱將稻草兮芳輕輕也收寡起來

焉爾 即大片田有一工若欲起大樓

這稻草兮芳 咱就佳哉有加留

留一個春天尾兮記得

留一個咱捌佇田內面做夥耍兮過去

春風若來

油菜花就墜落地

連根坮佇塗跤底

無怨無慼

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。