查某囝對阮讀冊會讀的冊攏無啥興趣，若讀到有對少年人這緣較有幫助的冊，我攏會加減簡單紹介內容予聽，看伊會有興趣同齊讀無？較濟攏無興趣。這遍桃園高中舉辦的「真人圖書館」活動，伊紲罕咧叫阮共報名，伊想欲來聽，特別共去神社顧店的時間排開。學校邀請來的冊中人物，是一個賣魚兼寫冊的少年家─林楷倫，伊出的冊叫做「偽魚販指南」。

阿倫明明真正咧賣魚，哪會叫家己是「偽魚販」？看伊的冊佮聽伊講了就知，才三十七歲的人爾，已經賣魚賣二十四冬矣！自細漢就愛共厝內底鬥相共賣魚，對彼時陣才讀國中的囡仔來講，阿倫伊足驚予人知，若有熟識的同學朋友行過伊的魚攤，伊就隨覕起來，所以一開始是厝內賣魚，雖然毋情願，嘛愛鬥跤手假咧賣，假久就變真的矣。

較大漢了，嘛定年定會拄到一寡對賣魚的職業歧視的語言跟行為。有𤆬囡仔來踅市場買魚的人客，就共怹囝恐嚇講，你若無愛讀冊，大漢就跟哥哥仝款來賣魚，人客毋知影這個賣魚的少人家，人是考到交大研究所矣。魚仔攤休睏矣，想欲去買一杯紅茶來啉，紲去予店員嫌，叫伊莫佇店來食，因為規身軀臭臊味會影響其他的人客。伊講今馬賣魚的人口老化，欲來做這途的少年人，其實較濟是理性分析的結果，伊捌拄過有讀台大電機來賣魚的。賣魚雖然是體力課，但是收入跟旦仔出社會的少年人比起來是幾偌倍，你若肯拍拼做，早早就會使退休，阿倫一開始講伊拍算四十五歲就會使財務自由。

是按怎一個攑刀刣魚的賣魚人，今馬會使順紲攑筆寫冊，閣得幾偌個文學獎？阿倫講做囡仔時代毋情願賣魚仔，伊會提筆起來亂寫，寫一寡五四三、中二的內容，予鬱卒的心情有所在通敨，大漢做一個作家是伊國中時陣的志願，伊一直攏對文學跟社會科較有興趣。阿倫提醒所有的家長，厝內若有愛亂寫的囡仔就予伊寫，莫睬伊攏寫遐的有的無的，抑是無營養的物件，無的確大漢就是一個出名的作家，文學獎叫伊愛加去參加。

這時陣，坐邊仔的查某囝越頭共我使一個目尾，若是叫我愛聽阿倫的話。無熟識的人一定掠做我是阿倫講的彼款爸母，會叫囡仔莫寫遐的有的無的。其實是查某囝知影怹爸三不五時會寫面冊貼文，鼓勵我嘛會使去跟人參加作文比賽，無定著有一工，怹兜會使出一個作家老爸。

猴囡仔真正毋是款，來聽演講應該是聽到對家己現此時有幫助的話就緊共記起來，譬如講阿倫按怎分析家己佮意跟無佮意的物件，無佮意的就直直共劃掉擲掉，佮意的就盡量排時間去學人按怎做，咱是毋是會使跟伊仝款，看按怎運用佇咱的工課跟生活中，結果伊紲提來教示怹老爸！

雖然心內底有淡薄仔切查某囝無大無細，但想到阿得老師有跟伊講過，叫伊愛用少年人的活力去影響厝內這兩個老伙仔，毋通予阮老傷緊。所以我知影查某囝是咧鼓勵我，但我這個做老爸向望的是，伊先發揮少年人的活力直接做予阮看，阮兩個老仔才來綴伊行。

今馬阿倫用伊的專業，大大縮短賣魚的時間，趁怹兩個囡仔猶細漢，會使開較濟的時間來陪伴怹大漢。逐工攏有排出時間來寫物件，按呢作一個作家寫冊出版的夢想嘛會使同齊兼咧完成矣。雖然賣魚的時間縮短就無賺遐濟，但是伊今馬猶未四十五歲就先有自由，財務上賣魚減賺的部分，伊就用作家的身份補轉來，寫冊是伊的興趣，嘛毋是體力課，按呢伊做到老老嘛無問題。