佇台北市區，有一條巷仔，一爿是學校，另外一爿是住宅區，這是一條台灣城市定定看會著的平凡巷弄。

Tī Tâi-pak tshī-khu, ū tsi̍t tiâu hāng-á, tsi̍t pîng sī ha̍k-hāu, līng-guā tsi̍t pîng sī tsū-the̍h-khu, tse sī tsi̍t tiâu Tâi-uân siânn-tshī tiānn-tiānn khuànn ē tio̍h ê pîng-huân hāng-lōng.

但是，比較較特殊的是，這條巷仔也號做「自由巷」，佇自由巷內底，有一个看起來無啥仝款的所在，就是佇一 棟民家厝的三樓，掛著鄭南榕紀念館的看板，窗仔外有a-lú-mih網仔佮鐵線網仔，外壁閣有燒焦、薰烏的痕跡。

Tān-sī pí-kàu khah ti̍k-sû--ê sī, tsit tiâu hāng-á iā hō-tsò “Tsū-iû-hāng”, tī Tsū-iû-hāng lāi-té, ū tsi̍t ê khuànn--khí-lâi bô sánn kāng-khuán ê sóo-tsāi, tiō sī tī tsi̍t tòng bîn-ke-tshù ê sann lâu, kuà-tio̍h Tēnn Lâm-iông Kì-liām-kuán ê kha̋ ng-páng, thang-águā ū a-lú-mih bāng-á kah thih-suànn-bāng-á, guā-piah koh ū sio ta, hun oo ê hûn-jiah.

鄭南榕紀念館就咧這間小小的民家厝內面，蘊藏了強大的社會啟明的能量。因為伊代表著佇台灣民主化的過程 中，濟濟的前輩為台灣拍拚所付出的代價，以及群眾奮力爭取自由的精神。

Tēnn Lâm-iông Kì-liām-kuán tiō tih tsit king sió-sió ê bîn-ke-tshù lāi-bīn, ùn-tsông liáu kiông-tāi ê siā-huē khé-bîng ê lîngliōng. In-uī i tāi-piáu-tio̍h tī Tâi-uân bîn-tsú-huà ê kuè-tîng-toing, tsē-tsē ê tsiân-puè uī Tâi-uân phah-piànn sóo hù-tshut ê tāikè, í-ki̍p kûn-tsiòng hùn-li̍k tsing-tshú tsū-iû ê tsing-sîn. 1988年12月，

鄭南榕佇伊家己所創辦的《自由時代》週刊頂 懸刊登了〈台灣共和國新憲法草案〉，因此佇第二年 的1月， 伊收著叛亂罪的傳票。

It kiú pat pat nî tsa̍p-jī--gue̍h, Tēnn Lâm-iông tī i ka-kī sóo tshòng-pān ê “Tsū-iû Sî-tāi” tsiu-khan tíng-kuân khan-ting liáu “Tâiuân Kiōng-hô-kok Sin hiàn-huat Tshó-àn,” in-tshú tī tē-jī nî ê it--gue̍h, i siu-tio̍h puān-luān-tsuē ê thuân-phiò.

對鄭南榕來講，刊登「新憲法草案」是伊咧實踐伊家己上蓋基本的權利，所謂的「叛亂罪」，只是一个「無影跡 的罪名」，也是言論自由被打壓的象徵。

Tuì Tēnn Lâm-iông lâi kóng, khan-ting “Sin hiàn-huat Tshó-àn” sī i tih si̍t-tsiān i ka-kī siōng-kài ki-pún ê kuân-lī, sóo-uī ê “puān-luān-tsuē,” tsí-sī tsi̍t ê “bô-iánn-tsiah ê tsuē-miâ,” iā-sī giân-lūn tsū-iû pī tánn-ap ê siōng-ting.

為了堅持包括「主張台灣獨立」在內的「百分之百言論自 由」，鄭南榕拒絕接受這項罪名。因此，伊行使「抵抗 權」，開始佇《自由時代》雜誌社自我禁監。

Uī-liáu kian-tshî pau-kuat “tsú-tiunn Tâi-uân to̍k-li̍p” tsāi-lāi ê “pah-hun-tsi-pah giân-lūn tsū-iû,” Tēnn Lâm-iông kī-tsua̍t tsiap-siū tsit hāng tsuē-miâ. In-tshú, i hîng-sú “té-khòng-khuân”, khai-sí tī “Tsū-iû Sî-tāi” tsa̍p-tsì-siā tsū-ngóo kìm-kann.

4月7號，國民黨政府派著大批的軍警到雜誌社強制掠人，經歷71工自我監禁的鄭南榕，因此佇雜誌社的總編輯 室，自焚殉道。

SÌ-gue̍h tshit hō, Kok-bîn-tóng tsìng-hú phài-tio̍h tuā phue ê kun-kìng kàu tsa̍p-tsì-siā kiông-tsè lia̍h-lâng, king-li̍k tshit-tsa̍p-it kang tsū-ngóo kann-kìm ê Tēnn Lâm-iông, in-tshú tī tsa̍p-tsì-siā ê tsóng-pian-tsi̍p-sik, tsū-hûn sûn-tō.

伊用伊的性命共咱講：自由，是有重量的。

I iōng i ê sìnn-miā kā lán kóng: Tsū-iû, sī ū tāng-liōng--ê.

感謝你來到鄭南榕紀念館，遮就是鄭南榕當年創辦《自由時 代》週刊雜誌社的所在。

Kám-siā lí lâi-kàu Tēnn Lâm-iông Kì-liām-kuán, tsia tiō sī Tēnn Lâm-iông tong-nî tshòng-pān “Tsū-iû Sî-tāi” tsiu-khan tsa̍ptsì-siā ê sóo-tsāi.

紲落來，你會看著鄭南榕的出世佮成長的背景，以及伊是按 怎創辦雜誌、組織社會運動。

Suà--lo̍h-lâi, lí ē khuànn-tio̍h Tēnn Lâm-iông ê tshut-sinn kah sîng-tióng ê puē-kíng, i-ki̍p i sī án-tsuánn tshòng-pān tsa̍p-tsì, tsoo-tsit siā-huē ūn-tōng.

透過相片、影像佮鄭南榕隨身的物品以及手稿，阮欲邀請你 行入伊的一生，體會伊的處境，理解伊的想法。

Thàu-kuè siòng-phìnn, iánn-siōng kah Tēnn Lâm-iông suî-sin ê bu̍t-phín í-ki̍p tshiú-kó, gún bueh iau-tshiánn lí kiânn-ji̍p i ê itsing, thé-huē i ê tshú-kíng, lí-kái i ê siūnn-huat.

現在，咱就轉來去到1980年代，同齊來看著鄭南榕的勇氣佮 決心。

Hiān-tsāi, lán tIō tńg-lâi-khì kàu it kiú pat khòng nî-tāi, tâng-tsê lâi khuànn-tio̍h Tēnn Lâm-iông ê ióng-khì kah kuat-sim.

--

Hosting provided by SoundOn