在台北市區有一條巷仔，一片係學校，另外一片係住宅區，係台灣城市輒輒看得著个平凡巷弄。

毋過較特別个係，這條巷仔又安到自由巷，在自由巷當中，還有一個看起來無共樣个地方，就係在一棟人屋个三樓，吊等鄭南榕紀念館个看板，窗門外背有鉛線網，壁項還有燒著烏溚溚仔个跡。

鄭南榕紀念館在這間狹狹个屋仔肚，囥等強大个社會啟蒙能量。因為佢象徵台灣民主化過程當中，這兜前輩為台灣打拚付出个代價，還過群眾煞猛爭取自由个精神。

1988年12月，鄭南榕在佢自己創辦个《自由時代》週刊項刊登了〈台灣共和國新憲法草案〉，故所在翻轉年1月收到了叛亂罪傳票。

對鄭南榕來講，刊登新憲法草案係佢在實踐自己盡基本个權利，所講个叛亂罪係沒影个罪名，乜係言論自由受著打壓个象徵。

為著堅持包含主張「台灣獨立」个百分之百言論自由，鄭南榕毋願意接受這項罪名。故所佢行使抵抗權，開始在《自由時代》雜誌社當中自家同自家關起來。

4月7號，國民黨政府派了大批軍警到雜誌社強制捉人，經過71日同自家關起來个鄭南榕，就在總編輯室自焚殉道。

佢用佢个生命同(人恩enˊ)講，自由，係有重量个。

承蒙您來到鄭南榕紀念館，這搭仔同時乜係鄭南榕該當時創辦《自由時代》週刊雜誌社个所在。

續下來，你會看到鄭南榕个出世同成長背景，還有佢係仰仔創辦雜誌、組織社會運動。

打幫相片、影像、 鄭南榕个隨身物品同手稿，邀請你行入佢个一生，體會佢个處境，了解佢个想法。

(人恩enˊ)共下轉到1980年代，共下看著鄭南榕个勇氣同決心。

--

Hosting provided by SoundOn