這搭仔係自由時代个總編輯室，乜係鄭南榕自焚个所在。

對決定自家愛同自家關起來起勢，其實鄭南榕就準備好愛犧牲了，除忒加安鐵門、窗門同鉛線網，愛防軍警硬攻入去，佢還同汽油同打火機，都準備好勢、就囥在桌仔下背。自家同自家關起來个逐日，佢隨時都在面對死亡。佢个親戚朋友還過佢个餔娘葉菊蘭當多擺去勸佢，毋過都無辦法改變佢个決定。佢識講過：「我係一個當有耐心个人，下決心當慢，係講決定了，就會當堅定，毋會改變。」。面對去勸佢个人，佢總係喊佢這兜去看《韓國學生運動史》這本書，底肚寫等韓國个學生仔用自焚表達信念，鄭南榕就係想愛用自焚个方式喊醒台灣人。

佢同自家關起來71日了後，當局在4月7朝晨，派出了大批軍警去雜誌社捉人，佢這兜打早就打電話落去假做愛訂雜誌个人，續下來再過雜誌社个電立切斷忒，愛雜誌社完全無辦法對外聯絡。

在雜誌社亂糟糟該下，大批軍警已經同雜誌社一層又一層包圍起來，按算愛對一樓攻上去。

這時節，鄭南榕同還在睡目个妹仔鄭竹梅喊醒，還過同佢託付分員工，喊大家遽遽離開。

就在大家當亂無注意到个時節，鄭南榕同自己鎖在總編輯室肚，用打火機同佢準備好汽油點著，自焚身亡。佢為著佢追求个理念，乜係為著佢痛惜个台灣還過過後个世代，犧牲了自己个生命。

--

Hosting provided by SoundOn