對鄭南榕自家寫个簡歷當中，就發現得著佢同自家个生命過程整理到清清楚楚。佢識做个事情，都係在實踐佢个理想，還過佢關心个事情，總係同台灣社會个傷痛當有關係。

佢係1947年，二二八事件該年出世，該當時戒嚴時期大家做麼該都驚狹狹仔，毋過佢打幫緊閱讀、緊思考，培養出一套自己个理念。佢毋願意去修該當時大學个必修課「國父思想」，故所就無辦法拿著台大个畢業證書毋過佢乜試著毋相干。做兵退伍過後，佢原在係做生理做了幾下年，毋過受到美麗島事件同林屋血案个刺激，佢開始同黨外雜誌寫文章。續下來，為著公布社會不敢講个真相，佢創辦了《自由時代》系列雜誌同發行出版品；為著愛打造還較好个台灣社會，佢發起了各種該社會運動。

在1980年代，就算台灣經濟逐定定仔較有發展了，不過嗄還係當毋自由，係講你話講差了當有可能分人捉抓去關，甚至分人判死刑。鄭南榕緊在該挑戰國民黨政府个底線，佢講出別人毋敢講个話、做別人毋敢做个事情，因為佢知，斯有緊去挑戰體制，正毋會久久分人揢死死。

--

Hosting provided by SoundOn