對鄭南榕家己寫的簡歷頂懸，會當發現伊將家己的性命過程整理到真清楚。伊所做過的代誌，攏是咧實踐伊的理 念，伊所關心的代誌，總是佮台灣社會的痛疼悲傷有密切的關係。

Tuì Tēnn Lâm-iông ka-kī siá ê kán-li̍k tíng-kuân, ē-tàng huat-hiān i tsiong ka-kī ê sìnn-miā kuè-tîng tsíng-lí kàu tsin tshingtshó. I sóo tsò--kuè ê tāi-tsì, lóng sī tih si̍t-tsiān i ê lí-liām, i sóo kuan-sim ê tāi-tsì, tsóng-sī kah Tâi-uân siā-huē ê thàngthiànn pi-siong ū bi̍t-tshiat ê kuan-hē.

伊出世佇1947年，二二八事件彼一年，自細漢就成長佇戒嚴時代的壓迫氣氛中，但是伊透過不斷的讀冊、思考， 培養出一套家己的信念。伊拒絕去修當時大學的必修課「國父思想」，即使因為按呢，伊無法度提著台大的畢業 證書，伊也無所謂。退伍了後彼幾年，伊原本是咧做生理，但是受著美麗島事件佮林家血案的刺激，開始為黨外 雜誌寫文章。紲落來，為著欲揭露社會上毋敢講出來的真相，伊創辦了《自由時代》的系列雜誌以及發行出版 品；為著欲打造閣較好的台 灣社會，伊也發起各種的社會運動。

I tshut-sì tī it kiú sù tshit nî, Jī-jī-pat Sū-kiānn hit tsi̍t nî, tsū sè-hàn tiō sîng-tióng tī kài-giâm sî-tāi ê ap-pik khì-hun-tiong, tān-sī i thàu-kuè put-tuān ê tha̍k-tsheh, su-khó, puê-ióng-tshut tsi̍t thò ka-kī ê sìn-liām. I kī-tsua̍t khì siu tong-sî tāi-ha̍k ê pit-siukhò “ Kok-hū su-sióng,” tsik-sú in-uī án-ni, i bô-huat-tōo the̍h-tio̍h Tâi-tāi ê pit-gia̍p tsìng-si, i iā bû-sóo-uī. Thuè-ngóo liáu-āu hit kuí nî, i guân-pún sī tih tsò-sing-lí, tān-sī siū-tio̍h Bí-lē-tó Sū-kiānn kah Lîm--ka Hiat-àn ê tshì-khik, khai-sí uī tóng-guā tsa̍p-tsì siá bûn-tsiunn. Suà--lo̍h-lâi, uī-tio̍h bueh kiat-lōo siā-huē-siōng m̄ kánn kóng--tshut-lâi ê tsin-siòng, i tshòng-pān liáu “Tsū-iû Sî-tāi” ê hē-lia̍t tsa̍p-tsì í-ki̍p huat-hîng tshut-pán-phín; uī-tio̍h bueh tánn-tsō koh-khah hó ê Tâi-uân siā-huē, i iā huat-khí kok-tsióng ê siā-huē ūn-tōng.

佇1980年代，即使台灣的經濟漸漸有咧起步，但是社會猶原真無自由，假使你若講毋著話，就真有可能會予人掠 去關， 甚至被判死刑。鄭南榕一直咧挑戰國民黨政府的底線，伊講出別人毋敢講的話、做別人毋敢做的代誌，因 為伊知影，只 有不斷的衝挵，才有敨開政治束縛的可能。

Tī it kiú pat khòng nî-tāi, tsik-sú Tâi-uân ê king-tsè tsiām-tsiām ū teh khí-pōo, tān-sī siā-huē iû-guân tsin bô tsū-iû, ká-sú lí nā kóng m̄ -tio̍h uē, tiō tsin ū khó-lîng ē hōo lâng lia̍h-khì kuainn, sīm-tsì pī phuànn sí-hîng. Tēnn Lâm-iông it-ti̍t tih thiáu-tsiàn Kok-bîn-tóng tsìng-hú ê té-suànn, i kóng-tshut pa̍t-lâng m̄ kánn kóng ê uē, tsò pa̍t-lâng m̄ kánn tsò ê tāi-tsì, in-uī i tsai-iánn, tsí-ū put-tuān ê tshiong-lòng, tsiah ū tháu-khui tsìng-tī sok-pa̍k ê khó-lîng.

--

Hosting provided by SoundOn