1984年，鄭南榕創辦了《自由時代》週刊，目的係為著愛突破該當時資訊傳播个限制，乜係為著佢个理念，佢識講過：「像𠊎這種思想訓練當深个人，辦雜誌係實踐信仰盡適當个方式。」

對雜誌社个各種細節，就看得出鄭南榕心當幼、做事情當揫齊、堅定个性。在該當時，發行雜誌愛出版事業登記證，毋過黨外雜誌輒輒當會因為寫了國民黨政府當局毋中意个報導，就分人查禁、收沒，雜誌斯愛分人查禁，就愛停刊一年，為著愛應付這種情形，鄭南榕先前就申請了18張登記證，還過用「時代」來做雜誌名仔个核心，斯愛一分人停刊了，佢就換過一張登記證、雜誌就換做另外一隻乜有「時代」个名仔，故所就算《自由時代》系列个週刊輒輒分人查禁收沒，在發行雜誌个5年8隻月當中，總共302期个雜誌就吂識分人停刊。

除忒發行雜誌計畫到當揫齊，鄭南榕對雜誌个內容乜愐了當多計。發行雜誌，就係為著打破國民黨政府對思想个封鎖，故所雜誌裡肚有益多批判蔣政府、公布軍方弊案个文章，乜輒輒出現愛同政治犯放出來、解除戒嚴个呼籲，有當多主流媒體不敢報導个新聞事件，像江南命案、蔣經國病危這兜，還較係倚勢像《自由時代》週刊這種个黨外雜誌報導來追蹤真相。該當時个台灣人，係講想愛知社會項發生了麼該事情，就愛想辦法去尋各種管道偷偷仔去買雜誌、偷偷个看，等到同朋友見面該下正來討論那期雜誌又寫了恁多麼該。台灣人對於真相个想望緊來緊大，這就係《自由時代》週刊做得計持續營運个關鍵，乜反映出台灣社會个變化。

在1980年代，記者分人監控、威脅這輒輒都聽得著，《自由時代》週刊个記者同無公布名仔个寫稿人乜共樣。故所，在雜誌个裡肚你會看到這句：「本刊文責做親由總編輯鄭南榕負責，請原諒裡肚無公布出作者个名姓。」鄭南榕為著愛分記者同無共布名仔个寫稿人毋使愁慮忒多放勢去寫出真實个報導，確保新聞品質，佢同所有个責任都㧡起來。這係佢作為雜誌社頭家个責任，乜係佢个溫柔。

--

Hosting provided by SoundOn