係講愛突破國民黨个軍警特務恐怖統治，淨係發行雜誌、寫文章批判，恁泥个力頭還毋罅，故所1986年，鄭南榕決定發起一場反戒嚴活動，乜就係「519綠色行動」，來抗議對1949年个5月19起勢，有37年恁久毋分人民自由个戒嚴令。

鄭南榕帶頭个綠色小組，串連了其他黨外雜誌个人，用雜誌、傳單、貼紙、說明會緊去宣傳，想愛分人民開始知好愛關心自家个權利。佢這兜邀請大家在5月19該日，用綠色絲帶抑係綠色布條，䌈在路燈、圍欄、樹仔這兜公開人較會注意著个所在，抑係䌈在自己个手臂項。係講想愛參加遊行，該恁呢就在5月19朝晨，加入鄭南榕个行列，在龍山寺集合，共下行到總統府。

恁大膽个作法，引起了國民黨政府个不安同不滿。

除忒收沒了宣傳品，在519該天，政府還較係派出兩千儕較加个軍警同龍山寺包圍起來，分本旦愛遊行个一群人離開毋得，故所佢這兜臨時決定改變行動，改在廣場項靜坐，來表達對國民黨軍事戒嚴統治个抗議。

本旦半點鐘个遊行，嗄挷長變作十二點鐘个延長戰。

同龍山寺包圍起來个，除忒有警察、憲兵、情治人員以外，還有支援个黨外人士、當熱心關注个民眾還過在路脣緊看个人。分人包圍跼在龍山寺个民眾，除忒靜坐以外，乜開始了一個嗄等一個个講演，輪等表達對37年戒嚴个看法，還過爭取人民權利个決心，大家決定了逐年都愛舉辦像恁呢个行動，一直到國民黨政府解除戒嚴為止。

這場519綠色行動，雖然盡尾無像本旦按算个行到總統府，毋過十二點鐘恁長个集會，還過附近仔群眾个支持，自由个仁已經開始在大家个心肝肚暴芽。

--

Hosting provided by SoundOn