在1986年个頭一場519綠色行動過後，鄭南榕還較係分國民黨政府當局看做係麻煩人物。過無幾久，在6月初2个朝晨，佢分人喊到派出所，嗄在半爛燦仔，分人載到中山分局、地方法院，盡尾在臨暗仔該下分人押到土城看守所，當場收押。

表面項，鄭南榕因為涉嫌違反選罷法分人控告，實際項，這係一場當局个迫害行動，因為鄭南榕寫文章、辦雜誌、做運動，這兜行為還過佢帶來个影響力當局分佢嚇著了，故所就藉等違反選舉罷免法做理由，同佢關了八隻月。

就算鄭南榕受著威脅，毋過佢無想生活總係愛驚狹狹仔，盡尾佢選擇直接面對同反抗。

分人關起來个時節，鄭南榕寫日記，紀錄了佢个日常、感想、同靈感，佢毋係一個話多个人，毋過對佢寫該日記肚，(人恩enˊ)盡無就觀察得著三種面貌个鄭南榕。

首先，佢係一個敢放手分下背人去做事个頭家，在佢坐囹仔期間，雜誌社个營運做盡由其他人負責，因為分工同制度清清楚楚，就算鄭南榕暫時無在，雜誌社還係做得順序運作。

過來，佢係一個行動思想家，除忒勞心百肚詳細想出經營雜誌个策略以外，佢還輒輒思考政治、哲學、經濟、台灣未來這兜議題，就像佢識講過：「愛行出來，作自家个主人。」佢無單淨係想定定，乜會用實際行動去追求佢个理想。

盡尾，佢同大家共樣，做人个子女、兄弟、朋友、老公同爸爸。佢係一個愛佢个餔娘、愛佢个妹仔个人，佢記錄了佢个餔娘葉菊蘭來拜訪个時節，乜記錄下佢个妹仔竹梅个成長。

鄭南榕在坐囹仔个時節盡最後一篇日記寫下了：「(人恩enˊ)係小國小民，毋過，(人恩enˊ)係好國好人。」還特別紀錄這係台灣未來个基礎。該當時係判決个前一日，面對吂知个判決結果，鄭南榕關心个，還係台灣个未來。

--

Hosting provided by SoundOn