1987年1月，分人關了八隻月過後，鄭南榕分人判無罪放出來了。佢正出來，就為著就愛到來个二二八四十週年籌辦紀念活動。鄭南榕在228那年出生，作一個外省爺同本地哀个細人，成長過程當中緊受到228个影響，還過，四十年來，國民黨政府緊鎮壓、封鎖資訊跟監控人民，係想愛分大家毋記得二二八屠殺事件，毋過大家斯係無講出來定定，心肝肚總係會驚，受難者同家屬毋敢企出來、台灣人毋敢插政治。鄭南榕認為，228就像在台灣个土地項割出一條當深个傷口，遺害就囥在這座島項儕儕人个心肝肚。面對這兜問題，佢認為定著愛先同228个真相公布出來。

由鄭南榕、陳永興、李勝雄等人整个「二二八和平日促進會」，2月13開了記者會，翻轉日在台南開始「二二八平反運動」个頭一場遊行，接著鄭南榕等人開始去到全台灣各縣市辦講演同遊行。

在遊行該時節，隊伍輒輒會受到軍警特務个影響，包含大規模搜索、收沒、圍堵、打人，乜識發生流血衝突，毋過鄭南榕無因為恁呢停下來，顛倒繼續在全台灣各地推動平反運動。佢在嘉義遊行个時節，鄭南榕同群眾取總在嘉義火車頭前，同二二八受難者同受難者屋下人深深一鞠躬致意，在頭擺，吂識有人對因為二二八屠殺事件著傷个靈魂出來會失禮，毋過鄭南榕試著這係佢該當愛做个事情。在國家挶恬恬个時節，係鄭南榕，先踏出了這步。

在各地个遊行抑係講演場合，成下仔會有受難者个家屬囥在角頭，緊講緊噭同鄭南榕握手表達承蒙，鄭南榕講：「斯有(人恩enˊ)企出來，佢這兜正敢跈等企出來，斯毋過就算佢這兜企出來了，還係囥在壁旯角。」這係台灣歷史項頭一擺，有人公開紀念228，要求愛查清楚真相，平反冤屈。這分族群開始了和解个第一步。在(人恩enˊ)今晡日講到「轉型正義」，二二八平反運動做得講係歷史項最關鍵該个時節。

【鄭南榕與三大運動­­： 1987 年 519反戒嚴、反國安法】

在1986年个519綠色行動過後，民間有緊來緊多行動緊去突破原旦毋敢講毋敢做該事情，包含民主進步黨成立、二二八平反運動這兜，因為國內社會同國際之間緊累積壓力，使致到國民黨政府按算愛解嚴，在這隻消息傳出來个同時，乜益像有聽著當局想愛用「國安法」來代忒戒嚴令，共樣限制言論自由，換一隻方法繼續揢等人民。故所，1987年个519行動口號除忒解除戒嚴以外，還有一隻係「反對國安法」，人民無愛威權統治，愛爭取自由民主到底。

一場在金華國中舉辦个，反國安法行前說明會項，鄭南榕上台講演，佢講：「𠊎安到鄭南榕，𠊎主張台灣獨立」成為了頭一個在公開場合講出「台灣獨立」个人。

1987年7月15，台灣解除戒嚴，同時施行國安法，還過原在个動員戡亂時期還係持續，還有懲治叛亂條例、戡亂時期檢肅匪諜條例、吂修正个刑法一百條，這兜法條造成社會還係有當多毋自由，當多人因為分人列做烏名單無辦法轉屋，人民當可能因為話講差咧分人捉去坐囹仔甚至分人判死刑，政府對人民个監控一奈仔就有。解嚴過後个台灣，並無真正就自由了。

--

Hosting provided by SoundOn