1987年7月解嚴過後，有當多政治受難者取總共下，8月成立了台灣政治受難者聯誼總會，成立大會項通過了寫等「台灣應該獨立」个章程，蔡有全、許曹德就恁呢分人捉去了，分當局用「預備意圖私佔國土」个重罪當庭收押，分別分人判了11年同10年。

蔡有全和許曹德个案件就證明了，就算解嚴，國民黨个黨國統治還係繼續揢等人民个思想同言論自由。

為著聲援蔡有全同許曹德，還過爭取住民自決个空間，政治受難者團體同鄭南榕在翻轉年，也就係1988年，發起了「新國家運動」。對11月16起勢，開始了有40日恁久个行路環島，佢這兜行入大街小巷，用和平个方式宣揚「新國家 新憲法 新文化」這兜主張，想愛喊醒全台灣人民認同台灣，關心台灣个前途。

仰講鄭南榕想愛建立新國家呢？佢識講出，自家對大學時代就開始思考這件事情，一直到佢創辦《自由時代》週刊，佢正定定仔公開表達台灣獨立个主張，這係佢思考了當久个想法。鄭南榕認為，台灣定著愛脫離殖民式个統治，斯有台灣真正獨立，正保障得著台灣人个人權、政治項个民主。

--

Hosting provided by SoundOn