上回提要：凱安經過「蛇變」之後，變成半人半魚怪物，潛入啞鈴洲深海一千米嘅海底，除咗感受到海底世界嘅奇妙之外，最主要目的係搵九頭海蛇嘅封印。當佢去到啞鈴洲邊界，誤以為邊界後嘅地方係九頭海蛇封印之處，用盡全力打想打破邊界防火牆嘅時候，人工智能K Area DB Island同裘雪趕到，K Area DB Island不斷變出三叉戟向凱安攻擊，一輪激戰之後，裘雪用自身阻擋凱安，凱安失血過多而昏迷...
*傳送門聲效
裘雪：（讀白）人工智能用傳送門將我地傳送到去千獸島度...我除咗件潛水盔甲，立即檢查阿安嘅傷勢。雖然開始停血...但傷口仍然好深...
K Area DB Island：裘雪，頭先點解你要擋係我面前？以凱安嘅衝擊力，佢支三叉戟好大機會打爆你嘅面罩，咁你就會即時缺氧死亡。
裘雪：因為...我相信阿安唔會殺我...同埋你會救我
K Area DB Island：雖然你地喺Game of Eden嘅數碼靈魂，但都係由容博士嘅基因科技創造，本質同人類相同，所以我都係唔能夠理解你地呢種行為
裘雪：點解...點解會變成咁...
K Area DB Island：後悔比蛇咬咗？
裘雪：其實...我地所有人都只係想係度平平安安咁生活啫...
K Area DB Island：平安兩個字，說易做難。每個人都有自己嘅執念，每種執念都會影響決定，繼而改變人生。大千世界就係由各種念所組成。裘雪你嘅「念」又係咩呢？
裘雪：我依家只係想阿安無事...我出去搵啲草藥返嚟醫治佢先...
K Area DB Island：唔駛啦。「蛇變」後凱安嘅身體好奇特，佢身上嘅傷已經開始癒合。
裘雪：阿安佢...可唔可以變返做普通嘅人？
K Area DB Island：係你想？定你以為佢想啊？
裘雪：（讀白）我無理會到人工智能嘅問題...只係全心留意住阿安嘅傷勢...雖然慢慢埋口...但阿安嘅呼吸仲係好虛弱...跟住人工智能又憑空變出一個物件，係一個圓形嘅球體。
K Area DB Island：因為過錯，所以後悔，因為後悔，所以希望重來。現實世界嘅人類希望發明時光機，改寫命運。
裘雪：咁...佢地成唔成功？
K Area DB Island：佢地有好多方法去擁有更多時間。至於喺呢個封閉區域，我可以做到。呢個刻有 Z 嘅水晶球，送比你。
裘雪：點解係我？
K Area DB Island：因為你係我咁多年以嚟最欣賞嘅村民。
裘雪：（讀白）我接過呢個水晶球之後，就繼續全心全意照顧阿安嘅傷勢。而經過一晚休息之後...佢終於...
*凱安咳聲
裘雪：阿安！你醒返啦！
凱安：（虛弱）阿雪...你...無事嘛？
裘雪：我無事啊！
凱安：阿雪...點解你要阻止我...
K Area DB Island：因為你所做嘅事係徒勞無功，兼且你破壞防火牆嘅行為會危害整個封閉區域。
凱安：你...你都係...神...?
K Area DB Island：我傳送呢度嘅創世資料比你，你就會了解真相。
*數據傳送聲效
K Area DB Island：數據傳送完成。
凱安：哈...哈哈...哈哈哈！！！
裘雪：阿安...
凱安：哈哈哈！啊！！！！！！！！
*用力打樹聲效
*樹幹斷裂聲效
K Area DB Island：如果打斷啲樹會令你好過啲嘅，你可以繼續。
凱安：所以阿雪你都知道呢度嘅一切？
裘雪：我都係被蛇咬到，遇到人工智能先知...我嘅反應同你差唔多...
凱安：即係我地咁多年都係活喺一個大話入面！？
K Area DB Island：信仰遠比神話嘅真偽更重要。
凱安：即係我地咁多年嚟都係白活啦！
K Area DB Island：咁就要睇你對「存在」同「生活」嘅定義啦。
裘雪：（讀白）阿安佢望一望自己對手…然後左手拎起旁邊本身刺傷佢嘅三叉戟…然後用三叉戟指實人工智能！
凱安：人工智能，話比我知盧綠，仲有嗰個所謂嘅玄武童子係邊！
裘雪：阿安，比你搵到佢地又點啫？打佢地？殺佢地？
凱安：阿雪，我要拎返我應該得野！
裘雪：阿安，你究竟想要啲咩啊？
凱安：我想要返我嘅時間！我啲人生！阿雪，你唔係仲想維護呢個虛構嘅神話啊？你唔係想當咩事都無發生過，繼續喺觀星閣推測根本唔存在嘅玄武大帝回歸之日啊？
裘雪：咁你想點啊？話晒比所有村民知一切都係假嘅？佢地係普通嘅村民，承受唔起呢個衝擊架！
凱安：佢地係人，唔係豬！有權知道所有真相！知道之後再由佢地自己決定！
裘雪：咁然後呢？成個啞鈴洲就會分裂，呢個就係你想得到嘅結果？
凱安：然後然後，我無咁多然後！我淨係知道呢一刻我就係自己嘅神！阿雪，你都經歷咗「蛇變」，你比其他村民更有權同力量去思考下一步點去做！
裘雪：我...無諗到咁遠...
凱安：咁你呢個最強大腦不如協助我去帶領啞鈴洲脫離盧氏家族嘅控制，創造屬於我地嘅啞鈴洲！
K Area DB Island：其實「蛇變」計劃，係為呢個封閉區域啞鈴洲嘅未來提供另一種選擇。裘雪代表智慧、知識同創造。而凱安你直頭係人類以外嘅另一知物種。一切都係今敏嘅預料之內。所以，我依家就帶你地兩個去搵今敏以及盧綠佢地，一同決定呢度嘅未來。跟我嚟。
—
裘雪：（讀白）人工智能帶著住潛水衣嘅我，仲有半人半魚形態嘅海安，由千獸島快速向東面遊過去。阿安一直都無出聲，只係跟住我地一直游...最後...我同佢都感受到呢個α 島上面有個7人嘅氣息，而阿安就加速！由海入面用力一躍！跳上α島！我同人工智能緊隨其後！
*跳躍及落地聲效
盧綠：阿安！點解你智變成咁架！？
盧葦/零：今敏！你對阿安佢做過啲咩啊？
今敏：乜你唔記得咗喺你仲係盧零，死後第一次轉世嘅時候，我同你提過喺天堂島用你死後嘅身體整一個機關，由你去手持一個佈滿盧恩符文嘅木盒，按唔同嘅符文去創造唔同嘅物種咩？
達：即係...我地喺天堂島度...由我撳完木盒彈出嚟嗰兩條蛇...令凱安變成咁...?
今敏：除咗凱安，裘雪亦都一樣。
K Area DB Island：佢地除咗身體有變異，亦得到全知狀態，同時亦得到啞鈴洲嘅創世資料。
盧婷/如：Zero，點解你當年要咁做呢？
盧葦/零：因為...今敏佢話若然創造新物種...可以解決啞鈴洲人口飽和嘅問題...同時將呢個隨機嘅重任...交到去阿康嘅後人手上...
凱安：喂喂喂，你地講嘅前因反果，我一啲興趣都都無。我出現喺度，第一個最想搵嘅人，係你！
*急步聲效
盧綠：（讀白）變成半人半魚狀態嘅阿安速度比以往快咗好多倍！唔駛幾秒嘅時間，佢就衝到去我地嘅身前！阿葦下意識衝前，想擋住佢！
盧葦/零：喂！阿安你做咩啊！
凱安：阿葦！唔關你事！
盧葦/零：你變成咁...我都有責任...今敏！你可唔可以變阿安變返做人！？
今敏：原本嗰條巨人、正義、新的開始嘅蛇只會令佢變得有神力，但可能大凶日，server rebot嘅問題，令到程式出錯，所以就變成咁Lu～
凱安：我嚟唔係想變返做人！我只係想！
盧葦/零：阿安！你想點啊！
凱安：盧葦！你行開！
盧綠：（讀白）阿安一手推開擋住喺前面嘅阿葦，阿葦反應唔切，被佢啲神力推開幾米咁遠！跟住阿安就揮出右拳！想一拳打向阿達！眼見阿安嘅揮拳準備擊到阿達塊面嘅時候！
凱安：啊！！！
*揮拳聲
*變物件聲效
*打中玻璃牆聲效
盧綠：（讀白）突然有一個透明嘅防護罩出現保護阿達！擋住阿安嘅攻擊！
凱安：啊！！！你呢個假嘅玄武童子同我出嚟！！！啊！！！
*揮拳發打中玻璃聲效
今敏：凱安，唔好意思，阿達佢嘅身份特殊，左手嘅能力都非常重要，所以我唔可以比你傷害到佢。
達：（玻璃內）凱安...我...完全唔知會變成咁架...
今敏：阿達，你係島外人。我諗你都係出少句聲，同埋～
*鎖鏈聲效
達：（玻璃內）今敏！你做咩鎖住我對手啊！？
今敏：慎防你用左手「D」嘅能力亂咁搞搞震～你都係乖乖地留喺玻璃保護罩入面欣賞呢個島嘅結局啦～
凱安：你就係今敏啊嘛～好！
盧綠：（讀白）凱安轉向衝去今敏度！揮拳擊向今敏！跟住今敏升起到半空，避開阿安嘅攻擊！阿安一拳落空，眼神凌厲望實今敏！跟住佢曲一曲膝，用力跳起！駛出寸刺！
今敏：睇嚟你基因變異得唔錯喎～不過可惜～我係呢度嘅神～
*重力聲效
盧綠：（讀白）今敏揮一揮手上啲木棒，本身跳起離地幾米嘅阿安被一度無形嘅力壓係地下！完全郁唔到！
凱安：（辛苦）今...敏...你...同盧零...就係...所有大話...嘅...源...頭...
今敏：無盧零，就無啞鈴洲～無我～亦都無啞鈴洲～所以，你要多謝我啊～
盧婷/如：夠啦！我地係嚟解決問題架！
凱安：（辛苦）佢地...就...係...問...題...
黑烏鴉盧天：雖然我唔知凱安你發生咩事，但我地依家最重要係令啞鈴洲重回正軌！
今敏：無錯啊～重力解除！
*解除重力聲效
盧綠：（讀白）今敏雖然解除重力，但就將凱安彈返去佢上岸嘅位置
*倒地聲效
盧葦/零：阿安，我決定咗由我同Fish嘅囝囡，即係小天同地仔去接替今敏嘅職位，繼續管理啞鈴洲，等大家維持呢度平安嘅生活。
凱安：創世又係你決定，過咗百幾年又由你決定。你憑咩決定啊！？
盧綠：就憑佢係第一代村長！
凱安：村長村長，你地盧氏有比過我地揀咩！？阿綠，你做得呢個位只係因為你姓盧咋！
盧婷/如：凱安，咁你想點啊？
凱安：我同12日前一樣，要挑戰你地嘅位置！
盧綠：阿雪！你勸下阿安啦！
裘雪：阿綠...唔好意思...阿安有佢嘅自由...同時我都冇能力去阻止佢...
今敏：好野好野～精彩精彩～喺度咁多年就係期待呢個畫面～
黑烏鴉盧天：今敏！你仲係度講啲風涼話！
今敏：嗱～搞清楚～我係交比你地去決定呢個封閉區域啞鈴洲嘅未來。至於我口中嘅「你地」，唔淨係你地盧氏～當然有埋裘氏同凱氏嘅後人，即係「蛇變」嘅凱安同裘雪啦～
黑烏鴉盧天：但係你令到凱安成為呢個狀態，從而有呢個諗法！件事先會演變成咁！
今敏：羅馬唔係一日建成，雪崩亦係所有雪花累積而成。同埋你地唔係想啞鈴洲更好架咩～係咪應該聽埋其他人意見，例如半人半魚嘅訴求～一齊傾下未來呢～
凱安：呢個啞鈴洲唔再需要虛假嘅神話！由我去擊敗你地！成為呢度嘅未來！
盧綠：（讀白）阿安佢一講完，就拎起地面上面嘅三叉戟，向我地盧氏所有人衝過嚟！
Zip噏劇場 Game of Eden 第二季 小島篇 第104回「島局（1）」
阿攝 飾演 阿達
CFun 飾演 盧綠
鄧添樂 飾演 盧葦及盧零
Crystal 飾演 盧婷及盧如
Kity 飾演 黑烏鴉盧天
Ant 飾演 今敏
Harry 飾演 裘雪
Alton 飾演 人工智能 K Area DB Island
Potter 飾演 凱安
編劇及製作 阿攝
音樂 BEAT FRIDAY (Belongs, Fairness, Phase, Playback, Minty, Stuk)
封面設計 Followmelikeblack
Leave a comment and share your thoughts: https://open.firstory.me/user/ckyhgwclu0xlr08721i22wc7k/comments
Powered by Firstory Hosting
