GC spielt über wiiti Strecke s’bessere Derby, vergit aber Chance um Chance. De FCZ macht us wenig viel, gaht zweimal in Füehrig und schafft’s trotzdem nöd, de Sieg über d’Ziit z’rette.

Mir reded über en überragende Sämi Krasniqi, dä Hack im Totalusfall-Modus und dä Doron Lichtenstein zwüsche Talent und Übermuet – und natürlich über die entscheidendi Frag: Hät GC zwei Pünkt verlore oder de FCZ zwei verschenkt?

De FCZ verlürt gege YB 2:4, zeigt aber gueti Ansätz – vor allem im Mittelfeld. Hine und vorne fehlt aber massiv Qualität.

GC holt gege St. Galle de ersti Saisonsieg und chunnt mit Ruggewind is Derby.

Usserdem: Perea isch suspendiert, de Fazliji-Transfer platzt, de Comenencia bliibt – aber bi GC wird de Kader no chli usgmistet.

Und jetzt s’Derby. Mir händ kei Ahnig, was passiert.

De FCZ holt sich in Lausanne en wilde 3:2-Sieg. Dä Umeh rennt mit de Kadenz vonere Nähmaschine zum Siegtreffer, während eus d’Defensive trotz drü Pünkt wieder einiges zum Diskutiere git. Usserdem Transferbewegig: dä Comenencia vor em Abgang zu Brest, Betim Fazliji neu bim FCZ – und generell d’Frag, was mit es paar Batzeli meh uf em Transfermarkt eigentlich möglich wär.

Bi GC wird’s weniger lustig: 2:5 bim bisherige Schlussliecht Vaduz. Muci isch en Aktivposte, wird aber zur Pause unverständlicherwiis usgwechslet – und nachher gheit GC komplett usenand. Während uf em Platz Abstiegskampf-Vibes ufchömed, sorged d’GC-Chefe mit Krawatte immerhin wieder für chli alti Bonzeclub-Romantik.

De FCZ verlürt de Klassiker im Letzigrund mit 1:2 gäge Basel – und natürlich git’s nach dere Partie meh als gnueg zum Diskutiere.

Mir reded über de früeh FCZ-Füehrigstreffer, de Check vo Malachowski gäge dä Kamberi, de VAR-Penalty nach em Hack-Zupfer und de vermeintlichi FCZ-Elfer i de Nachspielziit.
Aber Achtung: es baasleret diesmal überdurchschnittlich oft.

Jetzt inelose.

GC macht gege Regensdorf churze Prozess und günnt erwartigsgmäss mit 5:0 gäge Club mit 5 Ligene unterschied.

De FCZ muess sich gege Tugge dütlich meh bemüehe und rettet es 2:1 über d’Ziit. Tugge spielt 3 Ligene tüüfer als Züri.

Mir reded über die Cup-Uftritt, über die drü Zuezüg bi GC und de einti Abgang bim FCZ sowie die usbliibende Transfers.
Und wie immer: Zürcher Fuessball, zwei Meinige und gnueg Stoff zum Diskutiere.

Und: Danke für 5'000 Zuehörer

Euse Podcast wird wieder zur Therapiestund.

D'Grasshoppers verlüred gege Servette mit 2:1. Es isch aber nöd alles so schlecht wie de Rase i de Romandie: GC zeigt gueti Ahsätz und spielerisch Fortschritt. Pünkt gits defür trotzdem nöd – und gfühlt simmer scho wieder zmitzt im Abstiegskampf.

De FCZ wird in Lugano vo de Bianconeri grad mit 5:0 deklassiert. Viel Chance het mer nöd gha und au bim FCZ wird langsam klar: Uf em Transfermärt muess no öpis gah!

De FCZ holt sich zum 130. Bestehe mit em 2:1 gege Servette de erscht Saisonsieg. Spielerisch isch no längst nöd alles rund gloffe, aber Marcel Koller rüttlet sini Mannschaft i de Pause wach und wechslet mitem Spadanuda und Bangoura schliesslich de Sieg ii.

Mir reded über d'Energie vode Teams, de Spielverlauf und d'Leistig vo einzelne Spieler.

GC führt gege Lugano zur Pause no mit 1:0 – und verlürt am Schluss trotzdem 1:4. Mir lueged uf de kompletti Iibruch i de zweite Halbziit und diskutiered, was de Mannschaft aktuell no fehlt.

D'Summerpause isch verbii – endlich wieder Clubfuessball! ⚽

Mir sind zrugg mit de erste Folg vo de neue Saison und redet über d'Saisonstarts vo de beide Zürcher Clubs. GC holt zum Auftakt en Punkt, während de FCZ nach ere guete Leistig in Sanggallä am Schluss 2:1 verlüürt. Mir redet über eusi erste Iidrück vode beide Teams und redet über Transfergerücht und News.

🎙️ Züri Podcast Derby gaht i die zweit Saison. Inelose!

Für d’Schwiizer Nati isch hüt s’ganze Land früeh ufgstande: Public Viewings voll, Kafimaschinenä am Aschlag und au de Jan und de Michel händ direkt nach em Nati-Sieg ufgnoh.
Mir reded über de souveräni 2:0-Erfolg gege Algerie, über eusi Schwiizer Fussballkünstler, Manzambi, Ndoye, Embolo & Co. und ordned ii, warum die Nati plötzlich richtig turnierriif würkt.
Usserdem lueged mir uf d’WM allgemein, uf de möglichi wiiteri Weg im Turnier und bringed no zwei, drü News rund um eusi Zürcher Verein FCZ und GC.

Mir lueged mit de Züri-Brülle uf d'WM.

D'Schwiizer Nati lieferet Gspröchsstoff und mir läbed d'Emotione vode WM im Public Viewing. Nachem Sieg gege Kanada und em Gruppesieg, teiled mir Gedanke zu Schwachstelle und Stärchene vode Nati a dere Wältmeischterschaft.

De Michi Frey verlaht GC trotz Vertrag und de Perea weckt Interesse bimene griechische Verein, wo am FCZ wohl nöd gnueg Ablösi chan büte.