Такога вы не чулі

Лявон Вольскі (@Lavon Volski) на Еўрарадыё! Гэта інтэрв'ю ад 9 ліпеня, дзе мы сцябемся над Лукашэнкам і яго генераламі, гаворым пра тое, як упадзе рэжым, ці будзе канцэрт для добраахвотнікаў ва Украіне, чаму дэмсілы не могуць аб'яднацца, Беларусь як парламенцкую рэспубліку, чаго не хапае ў Еўропе і пра шмат іншага! А таксама слухаем музыку Лявона!

15 ліпеня беларуска-украінскі дуэт Michael Soul & Jusona прадставіў новую песню "Шлях". Мэседж трэка — свабода ёсць у крыві музыкаў, у іх ДНК, і ніхто не можа яе забраць.

У музычнай рубрыцы "Такога вы не чулі" з Майклам і Юляй мы абмяркоўваем "Славянскі базар", беларусаў — як людзей, у якіх нідзе няма правоў і тое, як музыкі могуць ствараць на фоне бясконцых узаемных крыўд беларусаў і ўкраінцаў. А яшчэ — слухаем "Шлях" і кавер на Hardkiss.

У ліпені беларускі гурт Relikt выпусціў магутны альбом кавераў на песні культавых гуртоў 1980-90-х. "Byli, Jość, Budziem" — шлях да таго, каб беларусы, якія не ведалі, што такое беларускі рок, нарэшце пачулі легенд і ў іх свядомасці нацыянальны сусвет выглядаў больш цэласна.

Цяпер каманда базуецца ў Польшчы. У музычнай рубрыцы "Такога вы не чулі" мы пагутарылі пра тое, як беларусам аб'яднацца і багата жыць у сваёй краіне, чаму каманда вырашыла пакінуць радзіму і чым мусіць чапляць новы альбом кавераў. Ну і яшчэ музыкі паігралі свае крутыя песні. Дарэчы, 13.07.2022 ў 19:00 па Варшаве яны выступаюць у пабе Beer Station, што на Львоўскай,6. Не прапусціце!

"Дом там, дзе мы", — аптымістычна кажуць Ксюша і Арцём з гурта Naviband. Паўтара гады музыкі жывуць у эміграцыі, але да нейкага аднаго месца не прывязваюцца — гастралююць па Еўропе і збіраюцца летам з канцэртамі ў Амерыку.

У музычнай рубрыцы "Такога вы не чулі" гутарым пра ўмовы, якія дазволяць гурту вярнуцца на Радзіму, пра вайну ва Украіне і музыку, прапаганду і спосабы захоўваць бадзёрасць у любой сітуацыі. А яшчэ — слухаем песні. У тым ліку зусім новую — "Мары".

Дарэчы, прыхільнікі гурта і людзі, якія любяць добрую музыку, рыхтуйцеся! 12-га траўня Naviband граюць у Вільні, 15-га — у Варшаве, 25-га — у Гамбургу, 28-га — у Празе, 29-га — у Вене.

Лідар "Дай Дарогу!" Юрый Стыльскі прывыкае да Варшавы — пасля пачатку вайны музыка прыехаў сюды з Украіны. Піша новыя песні, малюе. Спадзяецца, што летам зможа выставіць серыю сваіх карцін у адной з варшаўскіх культурніцкіх прастораў. Яшчэ сумуе. Гаворыць, што ўяўляе, як выглядае родны Брэст увесну.

У музычнай рубрыцы "Такога вы не чулі" мы гаворым аб узмацненні рэпрэсій у Беларусі, аб тым, чаму музыканты не павінны маўчаць і аб пакутах сумлення. Увогуле Юра не любіць гаварыць. Лічыць, што ў яго гэта атрымліваецца не надта складна. У адрозненне ад песень — звычайна тэксты ён піша доўга, вывяраючы кожнае слова. Сёння, дарэчы, мы пачуем і галоўныя "баевікі" "Дай Дарогу!" апошняга часу.

Часам здараецца, што заядлыя рок-н-рольшчыкі сталеюць і пачынаюць новы адлік пад электронны біт. Так сталася з удзельнікамі гурта Parade of Planets. Напрыклад, вакалістка каманды Юлія Багаслаўская раней выступала з гуртом U.G.OSLAVIA і збіралася аднойчы сабраць "Мінск-Арэну". Але ідэі змяняюцца. Цяпер Юля з сябрамі робіць модную франкамоўную (!) музыку. Сёння ў музычнай рубрыцы "Такога вы не чулі" гучыць кампазіцыя гурта "Où est ton amour?".

У першай палове 2020 года ў гурта Vuraj выйшаў незвычайны ЕР: у яго ўвайшло дзве палескія песні, здабытыя ў мінулагодняй веснавой экспедыцыі гурта. На кружэлцы гэтыя песні гучаць як у выкананні Vuraj, так і ў арыгінальным выкананні носьбітаў беларускага фальклору. У музычнай рубрыцы "Такога вы не чулі" ўдзельнікі гурта прадставілі трэк "Юр'я" і распавялі апошнія навіны.

Напрыканцы сакавіка мінскае трыа Haina выпусціла свой другі па ліку альбом "Фэйкі". Музыкі кажуць, што працягваюць рухацца ў некалі абраным кірунку, працуючы ў адметным саўндзе, якому няма аналагаў. Больш падрабязна пра новы LP каманда распавядае ў музычнай рубрыцы "Такога вы не чулі". А яшчэ выконвае песню "Бэйба" — другую на лонгплэі.

Два месяцы таму рэпер Аляксей СіРОП Загорын выпусціў дэбютны альбом "Страшила". У музычнай рубрыцы "Такога вы не чулі" СіРОП грае трэк з лонгплэя, распавядае пра яго асаблівасці, калабарацыю з AL(OH)3 і музыку ў часы каранавіруса.

NGe — беларускі гурт, які грае з 2008 года. На рахунку — некалькі ЕР, удзел у шматлікіх фестывалях і канцэрты ў розных краінах. У сакавіку 2020 года каманда выпусціла новы ЕР — "Сюжет".

У музычнай рубрыцы "Такога вы не чулі" музыкі прадстаўляюць трэк "Сияние", а вакалістка гурта Вольга Баразна распавядае пра асаблівасці міні-альбома, новае гучанне гурта і спевы на трох мовах.