26.02.2025, Çarşem, Berî Nîvro 

Serê sibê zû berî ez rûnim taştekê bixwim çayekê vexwim min vekir ji Zagros Film Festivalê, Bîraxane ya Bilal Korkut sêr kir.

Piştî min fîlm vekir bi min wer hat ku ez di danekî şaş de fîlmê sêr dikim, lê min got de tiştek nabe, hele ka çi ji vê meselê derdikeve. 

Bîraxane bi şiîrên şairê şêrgele Arjen Arî hal û hikayetên karakterên welêt û yekî ji derveyî welêt raber dike.

Ê ji derveyî welêt, Amerîkîyek e ku ji wan dûran daye dû şiîrên Arjen Arî û hatiye van nêzîkan.

Nivîskar Kazuo Ishiguro ser dostanîya edebîyat û sînemayê tiştekî pir enteresan dibêje.

Dema ez wan fîlman dibînim, dibêje Ishiguro mealen, ewên ji kitaban çêbûne, ez eforeka ekstra xerc dikim ku kitab neyê bîra min. A muhîm ew e ku dibêje İshiguro, fîlm bo min wekî fîlm bimîne.

Bîraxane ji fîlmbûna xwe pirtir şeveka şiîrên Arjen Arî ye; hele ku temaşevan mîna min çê xerab çavnas û guhnasê şiîrên Arjen Arî be, şev tevî van şiîran şeveka şerabî ye - nefret dikim ji bîna bîrayê, îmana min jê diçe bêmehne -

Min ji karakterên fîlmê, bi gotineka din ji karakterên şeva şiîrên Arjen Arî tewrî zêde ji ewî doktor hez kir ku meseleya Bîraxaneyê jî dibêje hinekî. Doktor dibêje, fîlm ne bi pereyan, lê bi fikran çêdibin.

Bilal Korkut fîlm bi çend fikran çêkiriye ku ji wan yek zelal e, xweş xuya ye.

Wî gotiye bi saya serê fîlmê, na nebû, bi saya dawîya fîlmê qet nebe şiîreka tirba Arjen Arî bikeve nêv dev û diranan û bigere li bajar û şaristanan:

kê negot ax û neçû

kî nebû ax û neçû

felek qajikê xwe bicû

Arjen jî dilbidax neçû

Omer Faruk Baran