اليوم ٣٤ | ٣٦٥ يوم من الصلاة

 يا رب، وسط الزحمة، والجري، والتشتيت…
ساعات ببعد من غير ما أحس، وألاقي روحي عطشانة ليك
أكتر من أي حاجة تانية.

في حاجات كتير حواليا بتاخد وقتي، بس ما فيش حاجة بتملّي قلبي زيك.
ولا في سلام يشبه السلام اللي بحسه وأنا قريبة منك.

يا رب، أنا مشتاقة لك. مشتاقة لصوتك الهادي جوايا،
للطمأنينة اللي بترجّعني لنفسي، وللنور اللي بيخلّي كل حاجة أوضح.

اليوم ٣٣ | ٣٦٥ يوم من الصلاة

يا رب، ساعات بخاف أشارك نورك مع غيري…
أخاف من رأي الناس، أو إني ما أكونش "كفاية".
بس إنت عمرك ما طلبت مني الكمال،
إنت طلبت قلب صادق.

إدّيني الشجاعة ، إني ما أخبيش الخير اللي عملته في حياتي.
الشجاعة إني أتكلم عن السلام اللي لقيته معاك،
حتى لو بصوت هادي، وحتى لو بكلمة صغيرة.

اليوم ٣٢ | ٣٦٥ يوم من الصلاة

يا رب، الطاعة مش سهلة. خصوصًا لما اللي إنت بتطلبه
يكون عكس خوفي، أو عكس اللي أنا مخططاله.

بس علّمني أثق إن أوامرك مش قيود،
لكن حماية. وإن خضوعي ليك مش ضعف…
لكن أمان.

اليوم ٣١ | ٣٦٥ يوم من الصلاة

يا رب…خلّي محبتي تشبهك.
محبة تتأنّى، وترفق،
وتفضل نور
في زمن بقى فيه القسوة أسهل من الرحمة.

اليوم ٣٠ | ٣٦٥ يوم من الصلاة

يا رب، الانقسام دخل بيوت كتير، وخلى القريبين يبقوا أبعد من الغُرب.

إرجع يا رب الودّ، قبل ما يرجع الكلام.
 إرجع القلوب لبعض، حتى لو اللسان لسه مش قادر يعتذر.

لين القلوب اللي قست، واكسر الكبرياء اللي واقف في النص،
 وفكّر كل واحد قد إيه العِشرة أغلى من أي خلاف.

اليوم  ٢٩  | ٣٦٥ يوم صلاة

يا رب، المعلمين شايلين تعب مش سهل،  ضغط،
 ومسؤولية،  وأوقات إحباط ما بيتقالش.

إدّيهم يا رب قوة يكملوا،  وصبر لما المجهود ما يتقدّرش،
 وطاقة يبدأوا من جديد كل يوم.

بارك كلامهم،  وكل كلمة بيقولوها،  وخليها تسيب أثر حقيقي  في حياة الطلاب.

يا رب، لما يتعبوا،
 ريّحهم.

اليوم  ٢٨  | ٣٦٥ يوم صلاة

يا رب، إهدّي الوجع اللي جوايا،  والتفكير اللي ما بيوقفش،
 والتعب اللي مش لاقي له اسم.

علّمني أعدّي الأيام الصعبة من غير ما أفقد نفسي،
 ومن غير ما أسيب الأمل.

إدّيني راحة مش مرتبطة بالظروف، لكن جاية من وجودك،
 راحة تلمس قلبي حتى وأنا لسه في نص الألم.

وإبعت يا رب ناس حواليا  تفهم،  وتسند،
 وتكون حضن في وقت أنا محتاجه.

اليوم  ٢٧  | ٣٦٥ يوم صلاة

 الشباب تايه بين طرق كتير، وصوت العالم عالي،
 وكل حاجة بتشدّهم في اتجاه.

يا رب، في اختيارات كل يوم،  وفي لحظات بتفرق
 بين طريق يِبني,  وطريق يِضيع.

إدّيهم حكمة يميّزوا،  وقلب يسمع صوتك وسط الزحمة،
 وشجاعة يقولوا "لا"  لأي حاجة تبعدهم عن الخير.

اليوم  ٢٦  | ٣٦٥ يوم صلاة

يا رب، الأطباء والممرضين،  اللي شايلين تعب ناس كتير،
 وبيشوفوا الألم عن قرب، وبيقفوا ثابتين حتى لما قلبهم يتأثر. 

إدّيهم يا رب قوة،  لما التعب يكتر،
 وصبر

اليوم  ٢٥  | ٣٦٥ يوم صلاة

يا رب، احفظ عقلي من المقارنة، وقلبي من التشتت،
 وروحي من إنها تتوه وسط الزحمة الرقمية.

خلّيني أعرف أوقف،  وأهدى،
 وأرجع لنفسي…  ولك.

وإستخدم كل حاجة في إيدي علشان أكون نور،
 مش مجرد صوت زيادة في الزحمة.