Son José Antonio, e isto é Conxecturas.

Se hai un acontecemento que marca a fin de curso en todas as etapas académicas son as graduacións. Si, unha celebración que non deixa de medrar e que está a xerar moitísimos problemas nos centros educativos. Son dunha xeración que non tivo nada diso, acababa o curso, cea entre todo o alumnado e festa. Agora, birretes, bandas, vestidos e zapatos de tacón, traxes de fin de ano, discoteca, con todo o que comporta.

Converteuse nunha especie de posta de longo, común nas clases altas españolas que simbolizaban a maioría de idade, aínda que máis parecida á "Quinciañera" latinoamericana.

De académico nada, aínda que se revista da estética de teleserie americana de High School.

É o momento de desligar estes festexos do mundo educativo. Se o revival histórico así o require, que as familias promovan estas postas de longo no ámbito particular.