John Mayall está considerado o gran impulsor do blues rock británico desde mediados dos anos 60 do século pasado ata a actualidade, xa que segue activo aos seus case 90 anos. Á fronte dos Bluesbreakers, a súa banda, Mayall foi o mentor de guitarristas excepcionais como Eric Clapton, Peter Green, fundador de Fleetwood Mac, ou o ex Rolling Stone Mick Taylor. Unha banda galega histórica, Siniestro Total, completa un episodio excepcional da Lista Negra.

Otis Rush foi outro deses zurdos marabillosos, curtido na época dourada do blues eléctrico de Chicago. Guitarrista cunha técnica exquisita e cantante dotado dun rexistro de tenor imbatible, Rush tivo unha longa e exitosa traxectoria. Ademais, esta semana escoitamos a estrea do novo álbum da Martins Aneiros Band.

Blind Willie McTell foi dos mellores representantes do Piedmont blues. Un mestre da guitarra de 12 cordas, dotado cunha voz fabulosa, que tivo un impacto enorme nos bluesmen da segunda metade do século XX, malia que non acadou nunca o éxito comercial. En palabras de Bob Dylan, "ninguén é quen de cantar o blues como Blimnd Willie McTell"... No programa desta semana tamén escoitamos os históricos Dr. Hello, califas do blues das Rías Baixas hai máis de dúas décadas...

Joseph Vernon Turner Jr. pasou á historia co seu nome artístico, Big Joe Turner. Curtido nos garitos de Kansas City desde os anos 20 do século pasado, Turner destacou como intérprete de boogie-woogie e jump blues na época da lei seca, antes de se converter nun dos pioneiros do rock and roll. A Lista Negra estrea a súa segunda temporada da man de Big Joe Turner, nun programa en que tamén lembraremos os coruñeses Miki Nervio & The Bluesmakers.

Charles Brown foi un cantante e pianista de estilo pulcro, elegante, sosegado, que acadou un éxito considerable trala Segunda Guerra Mundial e, tras un prolongado retiro, gozou dunha última etapa de recoñecemento catro décadas máis tarde. A súa foi sempre unha aposta polo blues refinado, nas antípodas dos rudos bluesmen que emigraron a Chicago desde o Delta do Mississippi. No capítulo de hoxe a dose de blues galego corre a cargo dos Spoonfools.

Hudson Woodbridge, alias Tampa Red, foi un dos pioneiros do blues de Chicago e un mestre do slide do que aprenderon outras figuras posteriores como Big Bill Broonzy ou Elmore James entre outros. Tampa Red coñeceu o éxito e o esquecemento máis absoluto. Neste episodio tamén escoitaremos blues galego da man do harmonicista compostelán Marcos Coll.

Samuel Maghett, alias Magic Sam é un guitarrista esencial na historia do blues. Malia que morreu moi novo, con só 32 anos, e que a súa carreira profesional apenas durou unha década, o alcumado Rei do Trémolo deixou unha pegada imborrable e asinou algúns elepés que deben formar parte de calquera antoloxía do xénero. Sam foi un músico efervescente, audaz e imaxinativo, cun son inconfundible. A proposta galega desta semana é a do coruñés David LH.

Referente cultural absoluto do último século, premio Nobel de Litertura, estandarte da contracultura, Óscar á mellor canción, revolución nun só home e artista alérxico ás etiquetas, Robert Allen Zimmerman tamén é un dos bluesmen brancos máis lonxevos e senlleiros. De feito, leva tocando o xénero que nos ocupa desde o inicio da súa carreira ata o día de hoxe, en que os seus recitais evocan a atomósfera dos vellos clubes en que se curtiron os seus ídolos de xuventude. Aos seus 82 anos, Bob Dylan segue máis vixente que nunca, e este episodio é unha retrospectiva das súas pezas de blues máis senlleiras. Ademais, o noso presentador, Eduardo Herrero, devoto seguidor do bardo de Minnesota, achéganos unha das composicións da súa banda, En Casa del Herrero, inspirada precisamente nun tema de Dylan.

Como tantos outros, Herman Junior Parker fixo a viaxe desde Mississippi a Chicago. Parker teceu unha ponte do blues ao soul Gran cantante e notable harmonicista, a súa sona non lle fai xustiza ao seu legado. Junior Parker facía moitas cousas e todas ben. Tamén habemos buscar tempo para escoitar os galegos Hermanos Zapruder.

Todo o mundo ten dereito a se equivocar. Aleck Miller cometeu o erro de querer ser quen non era. Durante algún tempo usurpou a identidade de John Lee Curtis, artisticamente coñecido como Sonny Boy Williamson. Eran outros tempos e, aclarada a confusión, Miller pasou á Historia como Sonny BoyWilliamson II. Tamén como un dos mellores harmonicistas do blues moderno, que marcou a primeira xeración británica de bluesmen. Sonny Boy Segundo é o protagonista nA Lista Negra esta semana, en que o acento galego corre a cargo dunha banda fabulosa que xa non está en activo, Mil Demonios.