She Maralyn Crellin vees chebbal y chlaare s'jerree 'sy strane dy chlaareyn enmyssit 'Shiaght Laa'. Ta shin clashtyn ny cooishyn ass 'Kiaull as Cooish' marish Daniel Quayle, as shen goaill stiagh faaishnys ny hemshyr. Va faaishnys ny hemshyr ry chlashtyn ayns 'Goll as Gaccan' neesht, agh gyn meer er-lheh elley 'sy Ghaelg, ga dy row kuse dy enmyn buill as fockle ny ghaa elley va Phil Gawne as David Kinley loayrt mychione. Lesh jerrey currit nish er Dracula liorish Bram Stoker 'sy chyndaays 'sy Ghaelg, ta mee er n'ghoaill toshiaght er lhaih skeealyn ferrish ny Braaraghyn Grimm. Skeealyn quaagh dy liooar myr t'ad dy mennick, ta shin clashtyn skeeal ghiare as eisht toshiaght skeeal elley.