OPEN HEAVENS

MATALA LE LAGI MO LE ASO GAFUA 8 TESEMA 2025

(tusia e Pastor EA Adeboye)

Manatu Autu: Agasala ma le lagolago a le Atua (Sin and God’s support)

Tauloto Tusi Paia: Salamo 5:4 “Auā o oe, ‘e te lē se Atua e fiafia i le amio leaga; e lē mau fa‘atasi ma oe lē ‘ua fai mea leaga.”

‭‭

Faitauga - Tusi Paia: Isaia 59:1-2

Ina ua avea Iosua ma taitai o Isaraelu, na folafola e le Atua e lagolago ia te ia i taimi uma ma o so’o se mea e soli e ona alofivae e na te foai atu ia te ia ( Iosua 1:1-5). I le taimi atoa na taitaia ai e Iosua Isaraelu i le vao, na ia maua le moni ma le faamaoni o lenei folafolaga seia oo i le aso ma faatoilalo ai Isaraelu e se nuu laitiiti e taua o Ai. Ina ua maea lenei toilalo, na alu atu Iosua i le Atua ma fesili mo le mafuaaga o lenei toilalo, ona faaalia lea iai e le Atua o loo iai le agasala i le togalauapiga a Isaraelu (Iosua 7:2-11). O loo ta’u mai ai iai tatou tusa pe tatou te faia le finagalo o le Atua, ma ua maea folafola e na te lagolago ia tei tatou, e tuua i tatou ma aveese lana lagolago i le taimi tatou te faia ai le agasala. O le agasala e mafai ona liua se atalii poo se afafine o le Atua e avea ma fili o le Atua, e paia fofoga o le Atua e le mafai ona silasila i le amioleaga (Sapakuka 1:13), ma e tuua e le Atua lea tagata. 

E tele folafolaga matagofie na faia e le Atua ia Mose. Mo se faataitaiga, na ia fetalai ia Mose e la te ō ma ia ma e na te avatua fo‘i le mapusaga ia te ia (Esoto 33:14). I le Esoto 33:1 sa fetalai atu foi ‘iā Mose, ia ō a‘e ma le fanauga a Isaraelu i le nu‘u na ia tautō atu ai i ona tamā o Aperaamo, Isaako, ma Iakopo. Peitai ina ua lē usitai Mose i le Atua, na aveesea e le Atua lana lagolago ma na maliu Mose i le vao (Teuteronome 34:4-6). O le lē usitai i faatonuga a le Atua e aveesea ai le lagolago a le Atua. 

O Saulo o le uluai tupu o Isaraelu, ma na fuafua e le Atua e faavavau lana nofoaiga (1 Samuelu 13:13). Peitai ao nofo o ia i le nofoalii o le tupu, na faamaualuga ma ua lē usitai i le Atua (1 Samuelu 15:1-30). Na suia ai le finagalo o le Atua, aveese lana lagolago ma foai atu le nofoaiga tupu ia Tavita. O Samasoni foi na fuafuaina e le Atua e avea ma tagata maoae. Peitai ua amata ona ola i le agasala e ui na manatu, e lē taitai alu ese le Atua ma ia. O le aso na aveesea ai le lagolago a le Atua ma ia te ia, e na te lei iloa, seia oo ina saisaia o ia e ona fili (Faamasino 16:20). 

Le au pele e, o e faia se mea e ono aveesea ai le lagolago a le Atua mai ia te oe? Afai o loo e faia le agasala faalilolilo, ia taofia loa i le taimi nei. Aua e te manatu e leai sona taui ona o loo sologa lelei mea uma. O loo faamauina e le Atua. Ia e salamo i le asō ae lei faia sana faaiuga e liliu atu lona tua ia te oe. O e faia ea se mea e ono faaosofia le Atua e aveesea lana lagolago mai ia te oe? Ia aua lava nei aveesea le lagolago a le Atua mai ia te oe i le suafa o Iesu, Amene.

‭‭