Kanow an seythen ma

Nowodhow an Norvys Keltek

Yth esa meur a janjyow y’n gonisogeth an powyow Keltek y’n vlydhen ma. Nebes an brassa a hwarva yn Kernow, mes yth esa avonsyans y’n powyow keltek erell;

Yn Kembra

Devnydhyans yeth Kembra gans klapporyon Rygbi o doutys nebes dhe dhalleth an vlydhen wosa bos leveris prederow a-dro dhe dhevnydhya an yeth rag an kesstriv ‘Hwegh Kennedhel.’ Mes yn sojetys erell an Yeth o pur yagh hag yth esa ambosow dh’y dhevnydhya moy. An fylm ‘Havoc’ a veu fylmys yn Kerdydh gans sterennow Tom Hardy ha Forest Whittaker, ha lewys gans lewyer kembrek, Gareth Evans, ha diskwedhys dre Netflix.

Ynwedh yth esa towlenn-bellwolok nowydh rag fleghes yn Kembrek dhe benn an vlydhen, selys orth ki Ostralek ‘Bluey’ ha fylm Nadelik bywekhes a-dro dhe garow yowynk yn Kembrek henwys ‘Nolig’ ha’y deskrifans yw ‘hwedhel hweg a gerensa ha bos warbarth.’

Ordenoryon an Diskwedhyans Kembrek Ryal a veu gobrys a’ga omrians dhe yeth Kembra rag towlenna, desinya ha gul proviansow rag Yeth Kembra y’ga hwarvos.

Rag skoedhya Kembrek yn skolyow, Senedh Kembra a wrug reyth rag surhe dyskyblon oll yn Kembra dhe worfenna adhyskans skol avel ‘devnydhoryon anserghek Yeth Gembra.’

Gorsedh Kembra yn Eisteddfod Maes dhe amal Wrexham a dhegemmeras onan ha dew ugens den, seyth warn ugens yn gwisk glas ha peswardhek yn gwisk gwyrdh. Hag yth esa neppyth nowydh yn gonisogeth ilowek gans an kynsa Piwasow Ilow Du Kembrek. An hwarvos, tasegys gans Shirley Bassey, Levi Roots ha Sir Nick Young, a veu gwrys rag solempnya an roas, delanwes ha kevro a artydhyon dhu yn Kembra.

Yn Iwerdhon

Yth esa avonsyans yn Yeth Iwerdhon pan junyas Skol gynsa Sen Malachy yn Belfast an ragdres Scoil Spreagtha. Yma a-dro dhe beswar ugens skol y’n ragdres lemmyn gans a-dro dhe bymthek mil dyskybel. Ordenys gans an kowethas yeth Gael Linn an ragdres a veu gwrys rag kennertha skolyow a dhevnydh Sowsnek dhe dhevnydhya Iwerdhonek ynwedh. Mes yth esa preder a-dro dhe appoyntyans a Sowson a-dhiworth Newcastle avel pennlewyer Pennskol Galway drefenn na wodhya ev Iwerdhonek vyth. Ev a avowas dhe dhyski an yeth wosa degemmeres an soedh.

An Yeth a veu degemmerys nebes moy yn novys politek y’n vlydhen ma wosa bos devnydhys Iwerdhonek y’n kynsa prys bythkweth y’n Chi Kemmyn Predennek yn govynn dhe’n Pennmenyster, ha Konsel an Sita Belfast dhe wul polisi nowydh dhe dhevnydhya an yeth yn formel. Ynwedh yth esa erivirans gans Governans RU dhe gildenna lagha erbynn devnydhya neb yeth nag yw sowsnek yn lysow Iwerdhon Gledh.

Mes brassa nowodhow a-dro dhe’n Yeth y’n vlydhen ma o an ervirans dhe dhevnydhya Iwerdhonek y’n arwoedhweyth oll yn Gorsav Kres Meur yn Belfast. An DUP a veu serrys dres eghenn gans an ervirans drefenn bos gwrys gans unn venystres heb bos dedhlys gans an governans oll, hag i a dhervynnas daswel breusyek yn y gever.

Mes yn nowodhow lowenna, Kovadh y’n Norvys Guiness nowydh a veu gwrys yn Fleadh Cheoil na hEireann yn Wexford y’n vlydhen ma rag an brassa band ceili y’n norvys.

Yn Alban

Nyns yw klewys nowodhow meur a-dro dhe Yeth Albanek, mes y’n vlydhen ma, darlesa dre Yeth Alban a dhegemmeras onan poynt eth milvil a beunsow rag omdhrehevel wosa seweni fylm Drogober BBC Alba ‘An t-Eilan’. Ynwedh, an Kynsa fordh-vardhonieth wodhalek bythkweth yn Alban a veu lonchys yn ynys Skye.

Den yw an brassa ikon yn Alban martesen, Syrr Billy Connolly, a omdhiskwedhas y’n nowodhow lieskweyth, ow solempnya y dressa ha peswar ugens pennbloedh dhe’n tressa warn ugens a-vis Du . Tus a dhannvonas trubyttow hag ev a diskwedhas artweyth, tanow aga havadowder, selys orth y gnas yn y vloedhow yowynkka.

Yn Glasgow, dhe’n hweghves ha seythves a vis Gwynngala yth esa Pennseythun an ‘Big Yin’ rag y enora avel rann a solempnyans a’n eth kans degves ha dew ugens pennbloedh an sita.

Yn Manow

Yth esa tus yowynk ow tiskwedhes gonisogeth Manow dhe’n norvys y’n vlydhen ma. Bagas yowynk dons a-dhiworth Manow a veu dewisys rag donsya y’n Fest Dons Kennedhlek ‘Udance’ y’n kynsa tro, Mera Royle, telynores, a veu diskwedhys orth skrinyow y’n sportva kyns keskan ‘The Who’ y’n sportva an ‘Hollywood Bowl’ yn Los Angeles, bagas yowynkneth Manow ‘Scran’ eth yn Hel Ryal Albert yn Loundres yn mis Du, wosa argevrohow hel gans negysyow, alusennow ha tus erell rag gul rann yn ‘Music for Youth Proms’ ena. Hag an kynsa gwari-kan skrifys yn Manowek a veu profys y’n vlydhen ma ynwedh, wosa komposydh an moyha a-vri yn Manow, Matthew Warren, dhe leverel bos war y dowlenn dh‘y wul.

The post An Radyo 055 – Towlen Kalan an Vledhen appeared first on An Radyo.