Í Konsert kvöldsins heyrum við upptöku frá sænska útvarpinu frá tónleikum Glenn Hughes úr Deep Purple frá Sweden Rock festivalinu í fyrrasumar. Heyrum svo aðeins í Led Zeppelin á tónleikum árið 1972 og Önnu Calvi á Antigel Festival í Genf í febrúar. Anna Calvi er mikill töffari, heitir Anna Margaret Michelle Calvi, fædd 24. September 1980 í Twickenham á Englandi. Mamma hennar er ensk en pabbinn ítalskur. Og pabbinn hefur alltaf verið sérstakur áhugamaður um tónlist og það var í gegnum hann sem hún kynntist allskyns tónlist þegar hún var stelpa, allt frá Captain Beefheart og Rolling Stones til Mariu Callas. Og hún varð snemma hugfangin af hljóðfærum, sótti í öll hljóðfæri sem hún sá og reyndi að fá útúr þeim einhverskonar hljóð. Anna Calvi sendi frá sér fyrstu plötuna árið 2011 og hlaut fyrir hana EBJBA verðlaunin (European Border Breakers Award). Hún var líka tilnefnd til Mercury verðlaunanna fyrir hana og hún var tilnefnd til bresku tónlistarverðlaunanna 2012 sem nýliði ársins. Önnur platan hennar, One Breath, kom út 2013 og var líka tilnefnd til Mercury verðlaunanna. Anna Calvi er flinkur gítarleikari auk þess að vera fyrirmyndar söngkona og lagasmiður en hennar aðal hljóðfæri er samt fiðla, hún er með háskólagráðu í fiðluleik. Og Anna Calvi spilaði núna í febrúar á Antigel Festival í Genf í Sviss og hún var bara ein á sviðinu, hún og rafmagnsgítarinn. EBU tók tónleikana upp. Glenn Hughes er Englendingur, 67 ára gamall, var í eina tíð bassaleikari og söngvari Deep Purple, gekk til liðs við bandið þegar Ian Gillan hætti og David Coverdale kom þar inn í staðinn. Hann var í hljómsveitinni Trapeze frá 1970 - 1974 en gekk þá til liðs við Deep Purple og var með á þremur plötum, Burn, Stormbringer og Come Taste the band. Hann var líka söngvari Black Sabbath um tíma og á var með þeim á einni plötu - Seventh Star sem kom út 1986. Glenn Hughes hefur gefið út helling af sólóplötum og nokkrar plötur með hljómsveitinni Black Country Communion en þar eru með honum Jason Bonhan trommari, sonur John´s Bonham úr Led Zeppelin, og gítarleikarinn Joe Bonamassa. Og svo er hann líka í annari hljómsveit sem heitir California Bread og þar er Jason Bonham líka. Glenn Hughes var vígður inn í frægðarhöll rokksins fyrir þremur árum sem hluti af Deep Purple og er í frábæru formi, spilar mikið og syngur eins og hann sé tvítugur. Og síðasta sumar, 7. júní spilaði hann á Sweden Rock festival í Svíþjóð og sænska útvarpið tók það upp og við ætlum að heyra það í Konsert vikunnar.