Saklaust menntaskólagrín vindur upp á sig og Sólstrandargæjarnir gera allt vitlaust í sundskýlum einum fata, útataðir í sósulit á röngum tíma í vitlausu húsi. Björk stórnar eins manns her og hvíslar ábreiðu frá sjötta áratugnum í 4. sæti breska smáskífulistans. Fjöllistahópurinn Gus Gus fæðist, Bubbi og Rúnar sjá ljósið, Sálin rís úr dvala og Fjallkonan bömpar.

Botnleðja sigrar í Músíktilraunum og Drullumallar nýja plötu á mettíma, Halli Reynis fer hring eftir hring og Súkkati finnst það Vont en það venst en Ástin dugir Páli Óskari. Tónlistarhátíð Uxi veldur usla og breska pressan fer á kostum í umfjöllun um hátíðina en Maus hræðir rokkara landsins með draugalögum.

Árið er 1995

Þrettándi þátturinn í útvarpsþáttaröðinni Árið er .... Íslensk dægurlagasaga í tali og tónum fer í loftið á Rás 2 klukkan 16.05 laugardaginn 27. júlí og verður endurfluttur sunnudagskvöldið 28. júlí kl. 22.05.

Meðal viðmælenda í þrettánda þættinum, þar sem íslenska tónlistarárið 1995 verður tekið fyrir, eru Baldur Stefánsson, Emilíana Torrini, Jón Ólafsson, Jónas Sigurðsson, Gunnar Lárus Hjálmarsson, Vilhelm Anton Jónsson, Hreiðar Örn Kristjánsson, Ragnar Páll Steinsson, Haraldur Freyr Gíslason, Árni Matthíasson, Guðmundur Jónsson, Friðrik Sturluson, Björgvin Halldórsson, Ragnhildur Gísladóttir, Björk Guðmundsdóttir, Egill Ólafsson, Sigurður Bjóla Garðarsson, Valgeir Guðjónsson, Eggert Gíslason, Páll Óskar Hjálmtýsson, Markús Þór Andrésson, Úlfur Eldjárn og Elíza Geirsdóttir Newman.