OPEN HEAVENS

MATALA LE LAGI MO LE ASO TOFI 8 IANUARI 2026

(tusia e Pastor EA Adeboye)

Manatu Autu:  Aua e te maileia oe (Dont ensnare yourself)

Tauloto Tusi Paia: Faataoto 18:21 “O le oti ma le ola, o lo‘o i le pule a le laulaufaiva ia; o ē manana‘o i ai latou te ‘a‘ai i lona fua.”

‭‭

Faitauga - Tusi Paia:  2 Samuelu 1:1-16

 I Nigeria, e iai le tala masani e pule saoloto tagata i latou tala e faia, peitai e le mautinoa le saolotoga pea pe a maea le faia o tala. E ono malie lea faamatalaga ae e moni i le itu i la le agaga. Fai mai le Faataoto 6:2 “ua maileia oe i ‘upu a lou gutu; ‘ua maua oe i ‘upu a lou gutu.”

E lē taofia oe e le Atua mai le tautala, peitai e tatau ona e faaeteete ina ia aua nei maileia oe i upu e te tautala ai. I se vaitau ua mavae atu, o se tamaitai sa faatalitali i sana pepe mo le tele o tausaga, ua ia faapea atu i le Atua, “Le Alii e, tau lava ia ou tō faatasi, ona e ave lea o lou ola, pau a lou naunautaiga, ia aveesea lenei faamāina’. Ina ua oo i le taimi e fanau ai, na sau i le falemai a le lotu RCCG. Na umi na faatigā mo ni aso. Na matua tigaina ua oo ina valaau mai seisi ou te tatalo mo ia. Ina ua maea ona ou fesili atu ia te ia ini fesili, ua matou iloa ai ana upu na faia muamua,  ua ou faapea ane ia te a’u, ‘afai na filifili lenei tamaitai e fia oti, aisea ua filifili ai e sau i le falemai a le lotu?’ O loo manino e le o toe fia oti. Na matou ole atu i le Atua mo  lona alofa mitimutivale. Na tali mai o ia ma ua manuia lenei tamaitai ma ua alu i le fale ma lana pepe e malosi lelei. E te manatu i le mea e tupu pe ana leai se tagata o le Atua i lea taimi e toe faaleaogaina upu na ia faia ia te ia lava i le taimi sa fia maua ai se pepe, semanu e oti. 

O le faitauga o le Tusi Paia o le asō o loo faamatala ai le tala i se alii talavou na faaumatia e ana lava upu. Ina ua maea le oti o Saulo, o lenei tamaloa o se tagata Amaleka, na ia tamoe ia Tavita ma tau atu ia te ia ua ia fasiotia Saulo, e ui e lē o ia na fasiotia (1Samuelu 31:1-6). Na ia manatu a ia logo atu ia Tavita na ia fasiotia Saulo, o le a alofagia ai e Tavita o ia, peitai e faafeagai le mea na tupu, ma ua avea ana upu na oo ai le oti ia te ia. Ina ua faalogo atu Tavita o ia na fasiotia Saulo, o le tupu na faauuina e le tagata o le Atua, ua ia avatu le faatonuga i se tasi fitafita talavou e fasioti ia te ia.

Le au pele e, ia e mafaufau lelei i upu e te tautala ai, aemaise pe a oo i le taimi o loo maualuga ou lagona faale tagata. Aua e te faatagaina ou lagona, pe a e fiafia tele, olioli, ita, faanoanoa pe fememeai foi, e faaosofia oe e tautala i upu e te saisaitia ai ma aafia leaga ai fua lou lumanai manuia. Ou te tatalo ia e tautala i taimi uma ma le poto ma le alofa tunoa. Ia aua lava nei avea au upu e saisaitia ai lou tagata i le suafa o Iesu. O au upu e ono saisaitia ai lava oe. Ia e manatunatu lelei i au upu e faia i taimi uma, i le suafa o Iesu, Amene.