Ang Leon at ang Kordero

“Narito ang lingkod ko na aking hinirang, ang aking minamahal at lubos na kinalulugdan; ibubuhos ko sa kanya ang aking Espiritu, at siya ang magpapahayag ng katarungan sa mga bansa. Hindi siya makikipag-away o maninigaw, ni magtataas ng boses sa mga lansangan, hindi niya babaliin ang tambong marupok, hindi rin niya papatayin ang ilawang umaandap, hanggang katarunga'y hindi nagtatagumpay nang ganap; at ang pag-asa ng mga Hentil, sa kanya ay ilalagak.” (Mateo 12:18-21, pagsipi mula sa Isaiah 42)

Ang mismong kaluluwa ng Ama ay nagagalak sa tila isang lingkod na may kaamuhan at kahabagan ng Kanyang Anak. 

Kapag ang isang tambo’y nakabaluktot at malapit nang masira, magiliw itong hahawakan nang patayo ng Lingkod hanggang sa ito’y gumaling. Kapag ang mitsa’y aandap-andap at halos wala nang anumang natitirang init, hindi ito pinapatay ng Lingkod, kundi tinatakpan ng kanyang kamay at dahan-dahang hihipan hanggang ito’y muling magliyab. 

Kaya pahayag ng Ama, “Narito ang aking Lingkod na kinaluluguran ng Aking kaluluwa!” Ang kahalagahan at kagandahan ng Anak ay di lamang nagmumula sa Kanyang kamahalan, ni sa kanyang kaamuan, kundi sa paraan ng pagsasama-sama ng mga ito sa perpektong proporsyon.

Nang sumigaw ang anghel sa Revelation 5:2, ​“Sino ang karapat-dapat na mag-alis sa mga selyo at magbukas sa balumbon?” ang bumalik na sagot ay, “Huwag kang umiyak. Tingnan mo! Ang Leon mula sa lipi ni Juda, ang anak ni David ay nagtagumpay at may karapatang mag-alis sa pitong selyo at magbukas sa kasulatang nakabalumbon” (Revelation 5:5).

Mahal ng Diyos ang lakas ng Leon ng Juda. Ito ang dahilan kung bakit karapat-dapat Siya sa mata ng Diyos para buksan ang mga balumbon ng kasaysayan at ilantad ang mga huling araw.

Ngunit hindi kumpleto ang larawan. Paano nagtagumpay ang Leon? Inilalarawan ng susunod na talata ang Kanyang anyo: “Nakita ko sa pagitan ng matatandang pinuno at ng tronong napapaligiran ng apat na buháy na nilalang ang isang Korderong nakatayo na ang anyo ay tulad sa pinatay na” (Revelation 5:6). Karapat-dapat si Jesus sa kaluguran ng Ama hindi lamang bilang Leon ng Juda, kundi pati na rin bilang pinatay na Kordero.

Ito ang katangi-tanging kaluwalhatian ni Jesu-Cristo, ang nagkatawang-taong Anak ng Diyos  — ang kamangha-manghang pagsasama-sama ng kamahalan at kaamuhan.

Devotional excerpted from The Pleasures of God, pages 29–30

This article was translated by Joshene Bersales and was originally written by John Piper of Desiring God. To read the original version, click https://www.desiringgod.org/articles/the-lion-and-the-lamb

Joshene Bersales considers Joshua her Bible hero, and strives to have faith that can make the sun stand still. She graduated with an AB Literature (English) degree from Ateneo de Manila University. She is a writer, editor, and translator. Joshene loves theater, traveling, and tea. You can find her on IG (@joshenebersales) and Facebook (https://www.facebook.com/joshenebersales/).

John Piper (@JohnPiper) is founder and teacher of desiringGod.org and chancellor of Bethlehem College & Seminary. For 33 years, he served as pastor of Bethlehem Baptist Church, Minneapolis, Minnesota. He is author of more than 50 books, including Desiring God: Meditations of a Christian Hedonist and most recently Providence.