A colección Aquí Faltan Páxinas presenta en marzo a Olimpia Valencia, a primeira galega en licenciarse en Medicina na Universidade de Santiago de Compostela, en 1925. A ela gustaríalle ser pneumóloga, pero estaba mal visto que unha muller tratase homes, así que tivo que especializarse en xinecoloxía. Cando estalou a guerra civil pasou catro días presa, acusada de pertencer ao Partido Galeguista e asinar en favor do plebiscito do Estatuto de Autonomía de Galicia. Librouse do cárcere, pero non do estigma. A pesar do rexeitamento social, non deixou de ter relación co grupo galeguista. Foi sempre unha muller audaz e intelixente que soubo facerse respectar nun mundo de homes. A xornalista Ana Fuentes, autora do libro Olimpia Valencia. Oito décadas de historia desde os ollos dunha pioneira, compartirá con nós unha sesión na que abordaremos distintos aspectos da traxectoria vital e profesional desta pioneira. A sesión terá lugar o mércores 22 de marzo ás 19 horas na Sede da Deputación de Pontevedra en Vigo.