Sebastian Bürgin era in buob da Gelterkinden, fin il prim da favrer 2003. Cun la relaschada ord l'emissiun Musicstar ha cumenzà ina nova vita per Baschi. Or da l'emprendist mercantil è daventà in popstar. Fin oz è Baschi il sulet candidat da Musicstar che ha fatg carriera. En sia discografia dad otg albums ha el cuntanschì trais giadas aur e duas giadas platin. Il buob da Gelterkinden ch'era crudà ora da Musicstar anc durant las prerundas è daventà in popstar dal mundart, ina carriera che cuzza uss gia dapi 15 onns. Cun 1986 preschenta Baschi ses nov album. En quest Soundcheck raquinta Baschi da sia vita e dal bun e pli pauc bun or da la carriera d'in popstar. Ed el tradescha ses recept per in bun risot.