Cun quest ultim Soundcheck festivain nus ina schelta dals pli gronds albums finals en l'istorgia da pop e rock. Il Soundcheck final cun musica da sound da cumià. Era carrieras plain tuns genials han ina fin. Grondas bands ed interprets legendars e lur ovras finalas. E la schelta da quests gronds albums finals è grondischma. Dal grande finale fin tar las ovras final-peniblas. La finiziun da l'emissiun Soundcheck festivescha in pèr dals gronds albums finals dal pop e rock.

In concert dal Festival da jazz a San Murezzan: L'11avel Festival da jazz a San Murezzan ha gì ina glista da giasts cun nums zunt prominents: Stanley Clarke, Marcus Miller, Ludovico Einaudi – ed er il chantadur e saxofonist american Curtis Stigers. Sia carriera ha el cumenzà cun 21 onns – ed el è adina s'interessà per differents geners da musica sco pop, soul e folk, però en emprima lingia per il jazz, e cun quel è el er vegnì enconuschent.

Al Festival da jazz ha el interpretà semperverds sco «Fly me to the Moon», «My funny Valentine» e «I wonder why», in da ses agens tocs fitg enconuschents. Ses concert dals 27 da fanadur avain nus registrà ensemen cun SRF 2 cultura e quel udis Vus en il Soundcheck da questa sonda saira a las 19.00. Curtis Stigers, chant e saxofon, John Sneider a la trumbetta, Mathew Fries al piano, Cliff Schmitt al bass e Paul Wells a la battaria.

Avant 48 onns han quatter musicist englais fundà ina band per revoluziunar la musica da pop e rock. Fin oz èn ils Queen ina da las pli grondas bands da rock da tut ils temps. Lur numerus hits enconuscha l'entir mund! Sin tut ils 13 albums sa chattan numerusas perlas che mussan quest quartet legendar exact uschè grondius sco lur hits, dentant er da tut in'autra vart musicala. Quest Soundcheck fa ina via musicala tras la discografia da Queen, dentant senza ils hits.

Benedikt Alig è il Fudl. A Sursaissa bunamain uschè enconuschent sco il pli enconuschent skiunz da là. E pli probabel l'unic popstar regiunal da questa regiun. Ils emprims pass musicals ha Fudl fatg sco ghitarrist en ina band da metal. Lura è el daventa quel che sbragiva. Ed oz fa el musica quieta cun ghitarra acustica. Benedikt Alig e ses debut «Oceans & Me», il Fudl e las istorgias davos sia musica e la dumonda, sche quels da Sursaissa en nunmusicals – las respostas e la musica latiers – en il Soundcheck.

El è naschì e creschì si en ina famiglia da la musica classica, è dentant sa decidì per la ghitarra electrica e la muisca da punk. L'Engiadinais Marcus Petendi ha inventà il California Punkrock d'Ardez. Dapi in pèr onns è Petendi activ cun sia band Polyphone. El ha fatg la midada d'Ardez a Cuira ed ha barattà il California Sound cun ses agen style. Suenter duas plattas e numerus concerts èsi daventà in pau quiet enturn il musicist engiadinais e sia band.

Tge curra e passa cun Polyphone? In Soundcheck cun Marcus Petendi, sia musica, sias ragischs, ses preschent e l'avegnir da sia band.

El è in trubadur, in chatschadur, in pictur, in sculptur cun ina vusch ch'ins enconuscha gia dapi onns, e quai malgrà ch'il chantadur cun quella vusch ha pir 20 onns! Suenter in album cun il rappunz Giganto preschenta Mattiu Defuns cun «Da Funs» finalmain ses emprim album. Musica rumantscha cun in pèr singulas frasas englaisas, arranschà tschiffant en in vestgì poppig e frestg. Il battaisem ha lieu sonda, ils 17 da november a Cuira en il Quadro22. Mattiu Defuns e ses debut èn noss giasts en questa ediziun dal Soundcheck.

Avant 50 onns ha Jimi Hendrix edì ses ultim album electric ladyland – fin oz ina da las pli revoluziunaras plattas en l'istoriga da la musica da rock! Jimi Hendrix è fin oz il prototip dad in erox ghitarrist. Cun sia moda da sunar quest instrument ha el revoluziunà fin ils onns 70 la musica da rock e fatg cridar tut ils ghitarrists. Ses terz album electric ladyland è stà ses ultim, avant ch'el è mort ils 18 da settember a Londra. In Soundcheck cun in term da la musica da rock.

Els èn giuvens, selvadis e vollgas! E fan la musica che lur geniturs tadlavan durant la pubertad. La band turitgaisa Pablo Infernal tutga cun il nov album «Monologues» il gnerv da mintga rocker tranter 5 e 105 onns. Lur idols èn gia daditg pensiunads, en fossa, u relicts dal rock'n'roll che stgarpitschan anc adina sur las tribunas da quest mund. Tschuffas ghitarras, grondas battarias e sbragizis isterics. Rock dals onns 60 e 70 da la sorta infernala. Mintgatant schizunt cundida cun l'accord sext da Napoli. Quest Soundcheck è ina baruffa per Vossas ureglias e per las ureglias da Voss tat e Vossa tatta.

Trais fragliuns. Ina band da famiglia. E success da nulla sin tschient. Black Sea Dahu èn in fenomen en il mund da las medias socialas. Il clip cun la chanzun «In case I fall for you» ha fatg ord la band turitgaisa Black Sea Dahu stars sin Youtube. Varga in mez milliun clics. E tuttina nulla francs. En quest Soundcheck raquinta la chantadura e scheffa Janine Cathrein dal far musica cun frar e sora, dal success en las medias socialas e da la dira vita da musicista.

Il chant è il fil cotschen da mintga chanzun da pop e rock! Betg per la band Leech! Battaria, bass, ghitarras, keyboard e vibraphon tanschan per crear in sound plain istorgias magicas. Cun il nov album «for better or for worse» festivescha la band da Zofingen en il chantun Argovia ses 20avel. 20 onns musica da rock instrumentala, status da cult e fans sin lentir mund – cun in sound galaxias lunsch davent da trends e charts. Bassist e ghitarrist la Leech Dave Hofman - da mastergn producent da muisca – raquinta da las sfidas da cumponer senza chant, daco che sia band n'ha betg in chantadur e tge ch'è il fil cotschen da lur musica. L'instrumentala en vestgi da Soundcheck!