Lur eta Joseba etorri zaizkigu, beste 15 lagunekin, Hau Pittu Hau konpartsaren Euskara Saria jaso duelako Gure Zirkua ekimenak. Euskarazko zirkuaren alde egindako ekarpen itzela saritu nahi izan du konpartsa euskaltzaleak, euskararen sustapenean edo defentsan nabarmendu den norbaiten alde Aste Nagusian urtero egiten duen aipamen berezi horrekin.

Deskargatu hemen.

Aurkezpen gutxi behar dute jada gure protagonistak, larunbatean Arriagako balkoian lehenengoz ikusi genituen euren soineko eta txapel bereziekin eta jada badakigu Aste Nagusi honetako Pregoilaria eta txupinera direla Olatz Agirre Txori Barrote konpartsako kidea eta Francis Diez. Ibilbide luzeko musikaria da Diez: 1986an sortu zen Doctor Deseo, eta Diez ordutik dabil taldean. Musikaria hiriko Uribarri auzoan jaio zen, eta pregoian hori argi eta gabi utzi zuen, bilbotar «peto-petotzat» dauka bere burua, eta Aste Nagusiaren zale amorratua da. Olatz Agirre, Santutxu auzoan sortua; delineatzailea da ogibidez, eta eskulanak, sukaldaritza eta baratzezaintza gustuko ditu. Hamazazpi urte daramatza konpartsakide izaten.

Deskargatu hemen.

Piztiak konpartsako Juncal batu zaigu Aste Nagusiko saio berezian. Konpartsaren programazioa aurkezteaz gain, azpimarratu du txosna goizez ere irekita dagoela, eta pintxo beganoak eskaintzen dituztela; ahalegin berezia egiten dute bai bazkarietan, bai bokatetan aukera horiek bermatzeko. Aurtengo txosnaren dekorazioa ere hizpide izan da, benetan berezia baita.

Deskargatu hemen.

Bertsoa eguna da gaur Algaran eta urtero lez bertsolari andana ibili dira konpartsaz konpartsa. Gure mikrofono aurrean egoteko tartea ere hartu dute eta bertan aritu dira kontu kontari. Bertsolari gazteak protagonista; Ekhi Zuluaga, Kattalin Lizarraga, Nahia Echeverry eta Egiar Otaegi.

Deskargatu hemen.

Maialen Ibarra abeslari eta musikaria da, atzo lova loiarekin batera Bilbo Rock aretoan izan zen bertako pop rock programan parte hartzen. Izaera lotsatia izan arren jendaurrean abesten gero eta ohituago dagoena. Txikitatik izan du musika gertu, familia musikazale baten eraginez, eta 8-9 urterekin gitarra ikasten hasi zen Arrigorriagako Artizarra musika eskolan. Orain arte hiru abesti kaleratu ditu bere kabuz, Azaroan disko berria argitaratuko du.

Deskargatu hemen.

Kirikiño Ikastolak antolatuko du 2026ko Ibilaldia, Bizkaiko ikastolen urteroko jai , eta ekitaldiak berriro Bilboko kaleak beteko ditu maiatzaren 31n. 48. edizio honek euskara, hezkuntza, komunitatea eta herrigintza uztartzen dituen proiektu bizia izango da, eta Kirikiño Ikastolaren balio eta helburu historikoekin bat egiten du. “HIRI KIRIBILI BIL!” lelo eta logo berezi batekin aurkeztuko da jaialdia, eta auzoak, herritarrak eta komunitatea aktibatuz, euskararen eta euskal kulturaren erdigunea bihurtuko ditu. Amaia Galindez eta Haizea Etxebeste izan dira gurekin.

Deskargatu hemen.

Ikasle eguna izan da gaur Algaran. Gabriel Aresti euskaltegiko ikasleak paella txapelketa izan dute. Tartean Bakaiku barnetegitik etorritako ikasleak izan dira gurean.

Deskargatu hemen.

Bilboko Aste Nagusian, 27 konpartsetatik 14k Coca-Colari boikot egingo diote, Israelgo genozidioaren eta apartheid sistemaren konplize izatea leporatuta. Horrela, ez dute multinazionalaren edari, material ezta azpiegiturarik erabiliko, eta alternatiba jasangarriagoak bilatuko dituzte. Konpartsek azpimarratu dute Coca-Colak Israelgo kolonia okupatuetan jarduten duela, Palestinako baliabide naturalak ustiatzen dituela eta nazioarteko zuzenbidea urratzen laguntzen duela. Agur kanpaina jarri dute martxan, argi geratzeko kanporatzen dituztela.

Deskargatu hemen.

Eusko Jaurlaritzak eta hiru foru aldundiek Ticket Bai sistema ezartzera behartu dituzte txosnak, eta horren aurrean, Euskal Herriko jaietako ordezkariek mobilizazioa egin dute Bilbon. Txosnak «ondare inmaterialeko kultur ondasun» izendatzeko eskatu dute eta 20.000 sinadura bildu dituzte dagoeneko. Aurtengo txosnen diseinuek “Txosnak, Gureak, Denonak” kanpainari atxikimendua adieraziko diote, eta konpartsek azpimarratu dute txosnak kultura etaauzalanaren ikur bakarrak direla munduan. Iker Martin izan da gurea gai honen bueltan berbetan.

Deskargatu hemen.

“Confeti, el regreso” antzezlana Aste Nagusian estreinatu berri da. Komedia musikatua da, eta Confeti izeneko gazte talde baten historia kontatzen du. 30 urte igaro dira taldea elkartu zen azken aldiz; ordea, kideetako baten heriotzak berriro batuko ditu guztiak. Horixe da antzezlanaren abiapuntua.

Oholtzan honako aktoreak ikusiko ditugu: Mikel Losada, Leire Orbe, Josu Angulo Anthonisen, Leire Ucha, Aratxo Angulo eta Iñaki Urrutia. Obraren gidoia eta zuzendaritza Diego Pérezen eskutik datoz, eta BBK Aretoa da ekoizlea.

Abuztuaren 24 arte egongo da ikusgai BBK aretoan. Leire Ucha izan da gurean.

Deskargatu hemen.